A është rritur punësimi?! – Tabaku liston 5 fakte për të treguar realitetin shqiptar

Pas publikimit të të dhënave për rritje të punësimit në vendin tonë ka reaguar opozita nëpërmjet nënkryetares së Komisionit të Ekonomisë Jorida Tabaku. Kjo e fundit rendit pesë fakte se pse në vendin tonë nuk është rritur punësimi sipas saj.

Fakti i parë sipas Tabakut është se 1.3 milionë shqiptarë kanë aplikuar për t’u larguar nga Shqipëria për në SHBA që nga shtatori 2013. Ndërkohë që mbi 300 mijë shqiptarë janë larguar drejt vendeve të  Be-së. Janë vetëm 418 të punësuar në sektorin jo bujqësor, ndërkohë që forca e punës, pra punëkërkuesit, janë në rënie.

Një tjetër fakt sipas Tabakut është edhe ai i tatimeve që flet për bizneset e mbyllura. 3300 biznese që janë mbyllur vetëm për 2017, është hera e parë në historikun e Shqipërisë demokratike, ku numri i bizneseve të mbyllura tejkalojnë ato të bizneseve që hapen. Një tjetër fakt i listuar nga Tabaku është edhe plakja e popullsisë në vendin tonë.

Shqipëria po shpopullohet dhe këtë e tregon përditë e më shumë edhe INSTAT kur na fakton plakjen e vazhdueshme të popullsisë dhe se si rrezikojmë të shpopullohemi. Sipas deputetes së PD-së kjo është situata reale në Shqipëri në lidhje me papunësinë.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.