Administrativja i jep të drejtë Penzoil – Anulon tenderin e kolaudimit të pompave të karburanteve, urdhëron modifikime

Kompania ndërkombëtare Penzoil Trading ka fituar betejën ligjore përballë Ministrisë së Ekonomisë dhe Financave. Sipas një njoftimi të vetë kompanisë, që mban datën 27 maj, “Gjykata Administrative e Tiranës (Gjyqtarja Nafije Hasko), ka pranuar ankesën e paraqitur nga Penzoil kundër Ministrisë së Ekonomisë dhe Financave për anulimin e vendimit të Komisionit të Prokurimit Publik për tenderin e kolaudimit të pompave të karburanteve.

Gjykata Administrative e Tiranës anuloi vendimin e Komisionit dhe urdhëroi modifikime të pjesshme të kritereve të tenderit, pasi binin në kundërshtim me ligjin dhe me parimin e konkurrencës së ndershme dhe mos diskriminimin e konkurrentëve”, thuhet në njoftimin e kompanisë Penzoil. Gjithashtu, Gjykata hodhi poshtë kërkesën për marrjen e masave paraprake për tenderin, pasi aktualisht është i pezulluar.

Në shtator të 2018, kjo kompani depozitoi një ankesë pranë Komisionit, në lidhje me kushtet dhe kërkesat që duhet të plotësonin kompanitë pjesëmarrëse, duke i konsideruar si diskriminuese, kryesisht për kompanitë ndërkombëtare. Por, pasi tejkaloi çdo afat ligjor, pas një periudhe 4-mujore Komisioni i Prokurimit Publik rrëzoi ankesën e këtij operatori, duke i dhënë të drejtën Ministrisë të vazhdonte me shpalljen e garës për këtë koncesion.

Dhënia me koncesion e shërbimit të kolaudimit të pompave të karburanteve është kritikuar edhe nga ekspertë si dhe nga operatorët e karburanteve në treg.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.