Aksion në thertore dhe tregje – Urdhëri i Ministrisë së Bujqësisë, nga 15 tetori kontrolle në të gjithë vendin

Nga data 15 Tetor, Autoriteti Kombëtar i Veterinarisë dhe Mbrojtjes së Bimëve do të nisë kontrollet intensive në të gjithë thertoret dhe tregjet në  mbarë vendin, me qëllim garantimin e sigurisë së produkteve tek konsumatorët.  Urdhri i cili ka hyrë në fuqi mban firmën e Ministres së Bujqësisë në detyrë, Milva Ekonomi.  Sipas urdhrit në fjalë, Drejtoritë rajonale të veterinarisë dhe mbrojtjes së bimëve të koordinojnë aktivitetet e kalimit të ushtrimit të detyrave me strukturat e veterinarisë, me çdo njësi të vetëqeverisjes vendore, të territorit ku ushtrojnë funksionet dhe kompetencat e tyre.

Pavarësisht aksioneve që janë ndërmarrë vite më parë në këtë sektor dhe reformës në veterinari, sërish ka problematika të theksuara në procesin e lëvizjes, shitjes dhe therjes së kafshëve. Shumë bagëti lëvizin të paidentifikuara, pa matrikull, duke u kthyer në burim infeksioni. Certifikata veterinare vijon të mbetet një problem duke i bërë qytetarët të pasigurt për mishin që blejnë për konsum, pasi është kryesore në garancinë që jep për kontrollin e bagëtive që shkojnë për therje.

Ndërsa shumica e tregjeve të bagëtive nuk plotësojnë as kushtet minimale të sigurisë dhe higjenës. Po ashtu, abuzime ndodhin edhe në thertore, ku nuk mungojnë rastet që produkte e shitura të jenë të pacertefikuara.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.