AKU konfiskon 29 lopë të pamatrikulluara dhe 2 mjete transporti

Autoriteti Kombëtar i Ushqimit ka konfiskuar 29 lopë të pamatrikulluara dhe dy mjete transporti. Kontrolli është kryer nga AKU në mesnatë në aksin rrugor Sarandë-Qafë Botë bazuar mbi disa informacione.

Nga kontrolli është evidentuar se mjetet e transportit nuk kishin licencë për transport kafshësh dhe krerët e lopëve ishin të paregjistruara, të pamatrikulluara si dhe pa certifikatë lëvizjeje.

Ndërkohë, AKU ka njoftuar strukturat e krimit ekonomik dhe Drejtorinë e Bujqësisë në Vlorë për të vijuar procedimin administrativ dhe penal ndaj pronarit të kafshëve dhe dy drejtuesve të mjeteve.

Sipas AKU, këto shkelje e bëjnë të pasigurt dhe të rrezikshëm konsumin e mishit. Ndërkohë, njofton se vazhdon investigimi për origjinën e këtyre kafshëve, të cilat dyshohen se vijnë nga Greqia.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.