Ambasadat ruse në Europë ngelen pa naftë – Kompanitë refuzojnë t’i furnizojnë ato!

Ka pasur një thirrje për ndihmë nga Ambasada Ruse në Irlandë pasi thuhet se përballet me mungesë karburanti. Kuptohet se diplomatët janë ankuar se kompanitë irlandeze të naftës po refuzojnë të dërgojnë furnizime në pronat e tyre në Dublin për shkak të pushtimit të Ukrainës.

Ambasada është bërë pika qendrore e zemërimit irlandez mbi luftën e ndezur nga presidenti i vendit Vladimir Putin. Irish Daily Mirror raportoi se ambasada i ka shkruar një letër departamentit të Ministrit të Punëve të Jashtme Simon Coveney për këtë çështje.

Ata i kanë kërkuar Qeverisë që të ndërhyjë në atë që ata e kanë cilësuar si “rast qartësisht diskriminues”. I pyetur për këtë çështje të martën, Tánaiste Leo Varadkar tha se, megjithëse nuk ka simpati për ambasadën ruse, ka rregulla në të cilat Irlanda duhet të ndjekë kur pret diplomatë ndërkombëtarë.

I pyetur për letrën e raportuar, Departamenti i Punëve të Jashtme tha se nuk kishte asnjë koment për të bërë. Ambasada ka qenë skena e demonstratave të atyre që kundërshtojnë pushtimin e Ukrainës. Që nga fillimi i pushtimit, protesta janë organizuar në të gjithë qytetin dhe vendin, ndërsa si irlandezët ashtu edhe ukrainasit që jetojnë në Irlandë u mblodhën për të shprehur zemërimin për luftën.

Qeveria është përballur gjithashtu me thirrje të vazhdueshme për të dëbuar ambasadorin rus në Irlandë, Yury Filatov. Muajin e kaluar, një burrë u akuzua për dëmtim kriminal dhe drejtim të rrezikshëm pasi kamioni i tij përplasi portat e ambasadës në rrugën Orwell në jug të qytetit.

Të martën në mbrëmje ambasada nuk kishte konfirmuar nëse kishte arritur të siguronte furnizimin me karburant. Presidenti ukrainas Volodymyr Zelenskiy do t’i drejtohet Dáil dhe Seanad të mërkurën. Departamenti i Punëve të Jashtme nuk pranoi të komentojë mbi situatën. IrishTimes

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.