Apple kap vlerën historike të 1 trilion dollarëve – Kompania e parë publike në Amerikë që e arrin

Gjigandi i teknologjisë, Apple, arriti ditën e enjte vlerën historike në treg të 1 trilion dollarëve amerikane. Në numra kjo vlerë shprehet kështu: 1.000.000.000.000 USD.

Prodhuesi i iPhone-ëve u bë kompania e parë publike amerikane që e arrin këtë vlerë falë rritjes së aksioneve gjatë sesionit të fundit me 2.92%. Rritja erdhi pas rezultateve të kompanisë në raportin e fitimit të tremujorit të dytë.

Gara për të arritur e para në këtë rekord përfshinte edhe Amazon, i cili në Korrik kapi vlerën e 900 miliardë dollarëve. Megjithatë Apple ishte në avantazh duke qenë se kishte arritur këtë shifër në Nëntor të vitit të kaluar.

Tashmë rritja e Apple për vitin 2018 llogaritet në 22%, ndërsa në 12 muajt e fundit në 30%.

Analistët shprehen se ky gur kilometrik për kompaninë nuk do të jetë kulmi, por kompania amerikane mund të rritet përtej 1 trilion dollarëve. Shitjet e qëndrueshme të aparateve celularë dhe shërbimeve të tjera të ofruara nga kompania e bëjnë diçka të tillë të duket mjaft e realizueshme.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.