“Argument” – Sekretari i Shoqatës së Bankave: “Depozitat në nivel rekord”, Caslli: “Shqipëria me goditjen më të rëndë në rajon”

Të ftuar në “Argument” me gazetarin Enio Civici ishte mbrëmjen e sotme sekretari i përgjithshëm i Shoqatës së Bankave Spiro Brumbulli.

Sipas tij, banka në kohë pandemie shkëlqeu në shërbimin që i ka dhënë qytetarëve duke mos e ndërprerë për asnjë moment aktivitetin.

“Bankat u ndeshën me kufizimet e pandemisë ashtu si sektorët e tjerë të ekonomisë, por ajo që mbizotëroi ishte vazhdimi i aktivitetit. Pra për asnjë arsye nuk u pengua ofrimi i shërbimeve bankare dhe më shumë prioritet kishin shërbimet online. Bankat ndryshuan strategjinë në kohë rekord. Nuk u desh shumë kohë edhe për shkak të investimeve në vitet e kaluara. Kjo ishte për klientët që të mos vuanin nga kufizimet.

Edhe nga operimi i brendshëm, pjesa dërrmuese e stafit u zhvendos në shtëpi. Janë dy risi që morën vlerë për të mos ndërprerë aktivitetin bankar, ku edhe në shifrat e 9 mujorit nuk na tregojnë që ka rënie, por ka një aktivitet mbi-normal.”

Gjithashtu ai theksoi edhe rritjen rekord të depozitave nga qytetarët shqiptarë në 30 vitet e fundit:

“Jemi në pikën më të lartë depozitave në historinë e 30 viteve. Kemi arritur një shifër që nuk e kemi ndeshur më përpara. Edhe pse në fillimet e kufizimeve tërhoqën sasi cash nga bankat për çdo rast. Por nga qershori në vazhdim u vu re një rikthim shumë më i tepërt i parasë në depozita pa afat, jo vetëm nga individë, por edhe nga kompani. Duhet që kjo sasi parash të kthehet në investime.”

Duhen dhe produkte të tjera në këto depozita që klientët të drejtojnë sytë dhe investimet e tyre.

Ndërkohë i ftuari tjetër në “Argument” Maksim Caslli, partneri drejtues i Deloitte Albania dhe Kosovo , i cili shpjegoi se Shqipëria ka marrë goditjen më të madhe ekonomike në rajon, për shkak edhe të strukturës që ajo ka, shumë të varur nga turizmi

“Goditja ekonomike ka qenë e ngjashme në të gjitha vendet, pro në vendin tonë ka qenë më e madhe Arsyeja kryesore është struktura e ekonomisë tonë, si sektori i turizmit që u godit rëndë, që reflekton dhe rënien ekonomike të vendit në krahasim me të tjerat.

Sa i përket rënies së konsumit ka efekt më shumë në ekonomitë e mëdha, pro ne jemi goditur më shumë te eksportet e pakta që bëjmë dhe në remitanca. Ky është një dëmtim kryesor, që ne mbahemi si ekonomi.

Sa i përket konsumit të brendshëm kemi të bëjmë më shumë me një panik dhe rënie të besimit të qytetarëve, që këto kohë janë rritur depozitat, pra ka likuiditet. Shtresat në nevojë janë prekur dhe më shumë, ku kontributi i qeverisë ka qenë dhe më i madh. Në këtë mënyrë konsumohet për gjërat më të nevojshme. Njerëzit duhet të investojnë dhe mos ti dërgojnë lekët nëpër banka ku marrin 0% interes.”

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.