Banka e Anglisë zbulon kartëmonedhën e re 20 paund! Për herë të parë, një artist është imazhi kryesor. Në qarkullim nga 20 shkurti

Guvernatori i Bankës së Anglisë ka zbuluar kartëmonedhën e re 20 paund që mban imazhin e artistit Joseph Mallord William Turner. Kartëmonedha ka përbërje polimeri (plastike) dhe shënon edhe një hap më tej largimit nga kartëmonedhat e letrës.

Turner është artisti i parë që shfaqet në kartëmonedhën britanike. Turner ka qenë një piktor i njohur, i ndarë nga jeta në vitin 1851 duke lënë pas më shumë se 550 piktura vaji, 2 mijë piktura me bojë uji dhe 30 mijë skica në letër.

Kartëmonedha e re 20 paund vjen pas dy kartëmonedhave të tjera  5 dhe 10 paund që u hodhën në qarkullim në vitet 2016 dhe 2017. Banka i është drejtuar polimerit si lëndë përbërëse të kartëmonedhës për faktin se është më i pastër, zgjat më shumë dhe është i vështirë për t’u përthyer.

Po ashtu, Banka ka bërë të ditur se kartëmonedha e re është më e sigurtë dhe është shumë e vështirë që të falsifikohet. Kjo kartëmonedhë do të hyjë në qarkullim me 20 shkurt dhe do të qarkullojë përkrah kartëmonedhave të tjera 20 paund.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.