Basha për rritjen e çmimeve – ‘7 propozimet për t’ju ardhur në ndihmë qytetarëve’

Nëpërmjet një deklarate publike, kryetari i partisë Demokratike, Lulzim Basha ka folur mbi daljen e kryeministrit Rama në lidhje me rritjen e çmimeve dhe krizës energjetike dhe financiarë që mund të përballet vendi jonë. Basha ka folur për 7 propozime të cilat vijnë në ndihmë të qytetarëve.

Fjalimi i plotë i Bashës:

“Të nderuar zonja dhe zotërinj, tellalli i së keqes doli sot për të larë duart para shqiptarëve për atë që po përgatit për ta, rritjen e mëtejshme të çmimeve të energjisë, ndërsa tashmë të gjitha çmimet janë rritur ndjeshëm duke pamundësuar për qindra, mijëra familje shqiptarë përballimin e nevojave baze. Vërtet bota po përballet tani, por shqiptarët kanë 8 vite që përballen me çmimet më të larta në rajon, dhe ndër më të lartat në Europë të karburantit dhe energjisë. Në ato vende ku ndodhin rritje të diktuara nga tregjet ndërkombëtare, qeveritë e përgjegjshme ju vijnë në ndihmë të menjëhershme qytetarëve. Por a mund të ndodh kjo me këtë qeveri?”

“Shqiptarët e dinë mirë që jo. Ata e kanë parë se si në momentet më të vështira, kjo qeveri dhe ky kryeministër i ka braktisur. Kështu ndodhi me tërmetin, kështu ndodhi me pandeminë. Shqiptarët e kanë parë se si fondet e rindërtimit u përdorën për të majmur ortakët e Edi Ramës, dhe këto fonde jo të jepeshin për njerëzit në nevojë por për të marr në këmbim votën e tyre. Shqiptarët e kanë vuajtur në lëkurën e tyre vuajtjen gjatë pandemisë kur babëzia e kësaj pakice të korruptuar dha ndihmën më të ulët në Europë duke shkaktuar humbjen më të madhe të jetëve të humbura në kontinent, papunësi dhe varfëri.”

“Me këtë bilanc të zi, me këtë qeverisje që fatkeqësitë e njerëzve i kthen në gosti milionash për ortakët e tyre, detyra jonë është që të ushtrojmë edhe me ndihmën e qytetarëve të gjithë presionin e mundur që askush të mos braktiset, askush të vuaj makutërinë e kësaj pakice. Ndaj prioritetet në këtë moment të parë janë të qarta dhe të domosdoshme.”

• Së pari heqja e taksës Rama prej 240 lekë për litër karburanti.
• Ulja e TVSH-së nga 20% në 6% për ushqimet ashtu siç kemi kërkuar që prej javës së parë në kuvendin e Shqipërisë.
• Faturimi me çmime dhe sasinë reale të konsumit të oligarkëve të cilët faturohen në kurriz të konsumatorëve.
• Subvencionim i çmimit të energjisë për qytetarët.
• Mire menaxhim dhe ndalje të shpenzimeve të shfrenuara, luksoze të OSHE dhe KESH që janë kthyer në zhvatës të parave të shqiptarëve.
• Ristrukturim të buxhetit për tu përballur me një krizë që nuk ndalet me propagandë dhe fjalime.
• Më shumë para për shtresat në nevojë dhe ristrukturim të ekonomisë aktuale e cila për shkak të politikave të kësaj qeverie është e varur nga paraja e pisët dhe nga monopolet e oligarkëve.

“Të dashur qytetarë dhe qytetare, nisur nga eksperiencat e hidhura që përmenda pak më parë, vetëm këmbëngulja jonë e përbashkët i pamundëson këtij kryeministri dhe kësaj pakice të korruptuar të përdorë fatkeqësitë tuaja për tu pasuruar vetë dhe miqtë e tyre. Shqipëria është e juaja, jo e një pakice.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.