BE propozon udhëtimin pa viza për qytetarët e Britanisë së Madhe pas Brexit, me një kusht

Komisioni Europian ka propozuar sot që t’u japë qytetarëve të Mbretërisë së Bashkuar udhëtimin pa viza në BE pas tërheqjes së Mbretërisë së Bashkuar nga unioni, nëse edhe Britania e Madhe jep udhëtime reciproke pa viza për të gjithë qytetarët e BE.

Kjo do të thotë që qytetarët e Mbretërisë së Bashkuar nuk do të kenë nevojë për vizë kur të udhëtojnë në zonën Shengen për qëndrime të shkurtra deri në 90 ditë në çdo periudhë 180-ditore.

Në skenarin e një Brexit pa marrëveshje, kjo do të zbatohej që nga 30 marsi 2019, thuhet në njoftimin për shtyp të Komisionit Evropian.

Ky propozim është tërësisht i kushtëzuar nga dhënia e udhëtimit pa viza reciproke dhe jodiskriminuese për të gjitha vendet anëtare të BE-së, në përputhje me parimin e reciprocitetit të vizave.

Qeveria e Britanisë së Madhe ka deklaruar synimin e saj për të mos kërkuar viza nga shtetasit e 27 shteteve anëtare të BE për qëndrime të shkurtra për qëllime turizmi dhe biznesi.

Rregullat e BE-së për shtetasit jo-BE që udhëtojnë në union, të tilla si ato për kontrollin e kufirit, natyrisht do të zbatohen për qytetarët e Mbretërisë së Bashkuar sapo ata nuk do të jenë më shtetas europian.

Propozimi i sotëm është një nga masat e gatishmërisë së nevojshme si pasojë e tërheqjes së Mbretërisë së Bashkuar nga BE. Ai tani duhet të miratohet nga Parlamenti Evropian dhe Këshilli. Komisioni u bën thirrje të dy institucioneve që të bëjnë përparim të shpejtë në këtë propozim në mënyrë që të mund të miratohet në kohën e duhur përpara datës 30 mars 2019.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.