BE vendos unanimisht sanksione kundër Rusisë – Për herë të parë në fokus janë zyrtarët jo oligarkët

Ministrat e jashtëm të vendeve të BE kanë rënë dakord të vendosin sanksione të mëtejshme kundër zyrtarëve rusë lidhur me burgimin e kryeopozitarit rus Alexei Navalny.

Nëse miratohet nga Këshilli Evropian, do të jetë hera e parë që BE përdor një mekanizëm të ri të masave ndëshkuese kundër abuzimeve të të drejtave të njeriut.

Marrëveshja u arrit të hënën në një takim në Bruksel, ku u tha se katër zyrtarë rusë janë në shënjestër.

Sipas burimeve diplomatike, ata do të goditen me ngrirjen e aseteve dhe ndalimet e hyrjes në bllok, të cilat ka të ngjarë të hyjnë në fuqi pasi liderët evropianë të takohen muajin tjetër.

Por oligarkët nuk figurojnë në listë, për zhgënjimin e mbështetësve të Navalny. Përkundrazi, masat kanë për qëllim policinë dhe zyrtarët ligjorë përgjegjës për “trajtimin e tij të papranueshëm”, tha Ministri i Jashtëm austriak Alexander Schallenberg përpara takimit.

Kryediplomati i BE Josep Borrell tha në një konferencë shtypi të hënën se Rusia “po shkonte drejt një shteti autoritar dhe po largohej nga Evropa”.

“Ministrat njëzëri i interpretuan veprimet dhe përgjigjet e fundit të Rusisë si një sinjal i qartë të mosinteresimit në bashkëpunim me Bashkimin Evropian, por vendi duket i interesuar në konfrontim me Bashkimin Evropian,” tha ai, duke konfirmuar sanksionet e planifikuara, por pa dhënë detaje.

Shefit diplomatik i është dhënë detyra të hartojë emrat e zyrtarëve që përballen me sanksione, sipas diplomatëve.

Do të jetë hera e parë që Brukseli përdor këtë regjim sanksionesh, i ngjashëm me Aktin Magnitsky në SHBA.

Ky mekanizëm u mundëson 27 vendeve anëtare të ndëshkojnë ata që konsiderohen përgjegjës për abuzimet e të drejtave të njeriut përmes ngrirjes së pasurive dhe ndalimeve të udhëtimit.

Dosti Banushi – SCAN
Burimi: Euronews

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.