Beqaj: Rikthehet normaliteti në maternitetin e spitalit të Durrësit. Përballohen mbi 2500 lindje në vit
Rikthehet puna normale në maternitetit e spitalit rajonal të Durrësit pas avarisë së ndodhur disa ditë më parë në sistemin elektrik të këtij shërbimi. Brenda një kohe rekord u bë e mundur riparimi i dëmit të shkaktuar, dhe tashmë, puna po vijon normalisht. Ministri i Shëndetësisë, Beqaj, i shoqëruar edhe nga kryetari i Bashkisë së Durrësit, Vangjush Dako, inspektuan mjediset e maternitetit të qytetit bregdetar.
“Kemi pasur një situatë jo normale në maternitetin e Durrësit para 10 ditësh si pasojë e një avarie në sistemin elektrik, por për fat të mirë, që të nesërmen u rikthyem në rifunksionim, në shërbim, dhe tashmë, pas 10 ditësh, i gjithë shërbimi është rikthyer në normalitet. Edhe sallat e operacionit së shpejti do të jenë në funksionim”, u shpreh Beqaj.
Kreu i Shëndetësisë falenderoi mjekët dhe infermierët për ndërhyrjen në kohë, natën kur ndodhi avaria në sistemin elektrik, duke bërë të mundur evitimin e problemeve qoftë për nënat, qoftë edhe për bebet që kishin lindur.
“Në radhë të parë, falenderim për mjekët, infermierët dhe mamitë që atë natë reaguan me shumë shpejtësi dhe nuk patën asnjë problem, qoftë për nënat qoftë për bebet që kishin lindur. Falenderim dhe për punën që kanë bërë këto ditë se kanë punuar në situatë të mbingarkuar si pasojë edhe e riparimeve që duhet të kryenim dhe vazhdimit të shërbimit ,dhe kthehemi brenda javës në normalitet, sepse ky maternitet përballon një volum shumë të madh gjatë vitit me rreth 2500 lindje në vit”, theksoi ministri Beqaj.
Nga ana e tij, kryebashkiaku i Durrësit, Dako, u shpreh se institucioni që ai drejton është i gatshëm për të bashkëpunuar në çdo rast me Ministrinë e Shëndetësisë për zgjidhjen e çfarëdolloj avarie në mënyrë që qytetari të marr një shërbim sa më të mirë.
Osman Dedja/ RTVSCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.