Bizneset heqin nga puna 22 mijë punonjës – COVID-19/Në 6 muaj, largohen nga skema e sigurimeve 48 mijë individë

Rreth 48 mijë individë kanë ikur nga skema e sigurimeve shoqërore si kontribuues në gjysmën e parë të vitit. Sipas të dhënave zyratare të Institutit të Sigurimeve Shoqërore, të përpunuara nga TV SCAN, numri i kontribuuesve në 6-mujorin 2019 ishte 721,378 individë, ndërsa gjatë periudhës Janar- Qershor 2020 ka zbritur në 673,317 kontribuues. Duket se masat e marra për frenimin e përhapjes së Coronavirus në vendin tonë, duke bllokuar një pjesë të madhe të aktiviteteve ekonomike për rreth dy muaj ka dhënë efekt në të gjithë kategoritë që kontribuojnë në arkën e shtetit duke derdhur sigurime shoqërore. Konkretisht, rreth 22 mijë indivdë rezultojnë të kenë dalë të papunë vetëm nga firmat private,  2371 të tjerë kanë qenë të vetëpunësuar që janë detyruar të kyçin aktivitetet dhe të mos paguajnë kështu as sigurimet e detyruara. Nga pandemia janë prekur rëndë edhe të vetëpunësuarit në bujqësi, ku rezultojnë në 6 mujor, 15.283 kontribuues më pak në raport me të njëjtën periudhë të një viti më parë.  Me rreth 2200 individë është ulur dhe numri i kontirbuesve në ndëmarrjet buxhetore, me 3500 në ndërmarrjet jo buxhetore dhe njëkohësisht rezultojnë afro 2600 kontribues vullnetarë më pak. Ndërkaq pavarësisht rënies së kontribuesve, të ardhurat në skemë kanë pësuar një rritje të lehtë krahasuar me 6 mujorin 2019, duke arritur në rreth 40.3 miliardë lekë.

Numri mesatar i kontribuesve

Janar-Qershor 2019   721,378

Janar-Qershor 2020   673,317

Kontribues nga firmat private

Janar-Qershor 2019    413,664

Janar-Qershor 2020   391,633

Të vetëpunësuar

Janar-Qershor 2019    82,003

Janar-Qershor 2020   79,632

Të vetëpunësuar në bujqësi

Janar-Qershor 2019    58,701

Janar-Qershor 2020   43,418

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.