BOE rrit normën bazë – Në 0.75%, nuk do të nxitojë me ndërhyrjen e radhës prej Brexit

Banka e Anglisë ka rritur normën bazë të interesit sipër nivelit të krizës financiare, por sinjalizoi se nuk është në nxitim për të vazhduar ciklin monetar, prej pasigurive në lidhje me Brexit.   Komisioni i Politikave Monetare votuan në mënyrë unanime për të rritur normën bazë në 0.75%, nga 0.5%, nivel që ka qenë për pjesën më të madhe të dekadës.

Banka e Anglisë deklaroi se ekonomia britanike,  pavarësisht se pati rritje të ngadaltë në fillim të këtij viti,  po operon në kapacitet të plotë. Megjithatë, tkurrja monetare do të vazhdojë në mënyrë graduale, ndërkohë që Banka Qendrore pret që inflacioni të qëndrojë shumë pak sipër objektivit në vitet e ardhshme.

Projeksionet u përputhëm me bastet e investitorëve, që presin një rritje tjetër  të interesave në fund të 2019-ës dhe norma bazë të arrijë në 1.1% në fund të 2020-ës.  Ekonomia e pestë më e madhe në botë është ngadalësuar që prej referendumit të 2016-ës për të dalë nga Bashkimi Europian. Ndërkohë që më pak se 8 muaj kanë mbetur deri sa Britania të dalë, Londra dhe Brukseli nuk kanë arritur ende në një dakordësi mbi marrëdhënien e ardhshme tregtare.

Banka e Anglisë bëri të ditur se ekonomia mund të ndikohet ndjeshëm nga reagimi i konsumatorëve, bizneseve dhe tregjeve financiarë ndaj lajmeve për Brexit. Institucioni pret që ekonomia të rritet me 1.4% këtë vit, normë e pandryshuar nga projeksionet e muajit Maj,  por rriti vlerësimin për vitin 2019 në 1.8%.  Pagat pritet të rriten me një normë vjetore prej 2.5% në fund të këtij viti, përpara se të arrijnë në 3.25% në vitin 2019.

Guvernatori i Bankës së Anglisë Mark Carney, tha se të gjitha bastet për tkurrjen monetare do të tërhiqen, nëse nuk ka një marrëveshje për Brexit.  Disa investitorë argumentojnë se rreziku nga lufta tregtare përbën një tjetër arsye për kujdes nga Banka e Anglisë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.