BQE e ka rrugën e hapur  – Praet: Do të diskutohet përfundimi i stimujve në javën që vjen

Ekonomisti kryesor i Bankës Qendrore Europiane, Peter Praet, tha se institucioni ka besim se inflacioni po rritet drejt nivelit objektiv dhe do të debatojë javën e ardhshme mbi përfundimin gradual të programit të stimujve. Duke arritur një rimëkëmbje të ekonomisë nëpërmjet skemës së jashtëzakonshme të blerjes së obligacioneve në 2.55 trilionë euro, politikëbërësit e BQE kanë debatuar mbi përfundimin e këtij programi në fund të vitit, ndërkohë që kërcënimi i deflacionit është larguar dhe ekonomia e Eurozonës ka treguar performancën më të fortë në 1 dekadë.

Ndërkohë që politikëbërësit kanë arritur në konsensus se blerjet mund të përfundojnë, presidenti Mario Draghi ka shmangur bisedimet formale mbi heqjen e stimujve, pasi po pret për më shumë prova që inflacioni do të arrijë objektivin.  Draghi  shpalosi disa kritere përpara se blerjet të përfundojnë dhe Peter Praet tha se institucioni ka parë progres në të gjitha këto.

“Sinjalet për konvergjencë të inflacionit drejt objektivit tonë janë përmirësuar dhe fuqizimi i ekonomisë europiane, që po mbështet rritjen e pagave, ka shtuar besimin që niveli i çmimeve të arrijë  në atë nivel në afat-mesëm”, tha Praet. Ndërkohë që shumë politikëbërës presin një vendim final mbi përfundimin e stimujve në muajin Korrik, komentet e Praet nënkuptojnë se diskutimi do të nisë javën e ardhshme, kur të takohet këshilli drejtues.

Blerjet që janë reduktuar tashmë në 30 miliardë euro në muaj, pritet të vazhdojnë deri në fund të Shtatorit, por politikëbërsit kanë argumentuar se duhet të ulen gradualisht, në një kurs shtatë-mujor.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.