Brexit, ende i paqartë – Nuk arrihet dakordësi gjatë vizitës së May në Bruksel

Presidenti i Komisionit Europian, Jean-Claude Juncker, tha se bisedimet me kryeministren e Britanisë, Theresa May, ishin konstruktive, por shtoi se Bashkimi Europian nuk do të rihapë negociatat për Brexit.

May mbërriti në Bruksel ditën e Enjte për të takuar Juncker, presidentin e Këshillit Donald Tusk dhe presidentin e Parlamentit Europian, Antonio Tajani, për të biseduar për Brexit. Juncker deklaroi se Marrëveshja e Tërheqjes përfaqëson një kompromis të balancuar mes BE dhe Britanisë, nën të cilën të dyja palët kanë bërë shumë lehtësime. Juncker tha gjithashtu se çdo zgjidhje e mundshme do të duhet të miratohet nga Parlamenti Europian dhe  vendet anëtare.

Kryeministrja foli në perspektivën e parlamentit britanik, duke kërkuar një ndryshim ligjor të kushtit të masës parandaluese të Irlandës. Pavarësisht sfidave, të dy liderët ranë dakord se ekipet e tyre duhet të zhvillojnë bisedime nëse mund të arrihet një mënyrë për të fituar mbështetje nga Parlamenti Britanik dhe të respektohen udhëzimet e rëna dakord nga Këshilli Europian. May dhe Juncker do të takohen përsëri në fund të muajit Shkurt, për të shpalosur këto bisedime. May takoi gjithashtu Donald Tusk.

Ky i fundit, menjëherë pas takimit me kryeministren, shkroi në Twitter se “Nuk ka ende zgjidhje në horizont”. Tajani, pasi takoi May në Bruksel, përsëriti se Parlamenti Europian mbështet marrëveshjen që u ra dakord në fund të vitit të kaluar. Ai paralajmëroi se dalja pa marrëveshje do të jetë katastrofale për të dyja palët.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.