Bursat, në rritje modeste – Investitorët, të paqartë për të ardhmen e Katalonjës
Bursat europiane po qëndrojnë në rritje të lehtë në sesionin e sotëm, për shkak të raportimeve tremujore pozitive të korporatave. Por, investitorët po tregohen të kujdesshëm për shkak të krizës politike në Spanjë.
Indeksi pan-Europian, Stoxx 600, po qëndron në rritje me rreth 0.2%. Sektori i kujdesit shëndetësor po realizon performancën më të mirë, pasi kompania holandeze e teknologjisë mjekësore, por jo vetëm, Philips, raportoi se fitimet bazë u rritën me 12%, në 532 milionë euro, gjatë tremujorit të tretë të këtij viti.
Në anën tjetër, indeksi që mat sektorin bankar është në rënie me rreth 0.3%, me bankat spanjolle që realizojnë humbjet më të mëdha, për shkak të paqartësive politike në këtë vend. BBVA, Banka dhe Banco de Sabadell janë në rënie me rreth 1%. Kriza më e madhe politike në Spanjë në katër dekadat e fundit, ka hyrë në javën vendimtare, pasi Madridi zyrtar kërkoi “kontroll direkt” mbi Katalonjën.
Gjatë ditës së sotme ka pasur spekulime se, lideri i Katalonjës, Carlos Puigdemont, po planifikon të deklarojë në mënyrë të njëanshme pavarësinë e këtij rajoni. Përsa i përket të dhënave ekonomike, optimizmi i biznesit në Mbretërinë e Bashkuar ra për herë të parë gjatë 2017, në tremujorin e tretë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.