Çmimi i lartë i naftës – Tabaku: 60% janë vetëm taksa, koncesioni i pompave do ta rriste më tej

Çmimi i naftës në Shqipëri është më i shtrenjti në rajon, ndërkohë që rreth 60% e vlerës i kalon shtetit në formë taksash dhe tarifash”. Përmes një statusi në rrjetin social ‘Facebook’, nënkryetarja e Komisionit parlamentar të Ekonomisë, Jorida Tabaku risolli në vëmendje përfshirjen e taksave që fryjnë artificialisht çmimin e naftës në vend.

“Sot, kushdo që ka një makinë paguan më shtrenjtë se rajoni çmimin e naftës dhe merr një naftë të një cilësie të dobët. Praktikisht një makinë që do të furnizohet me 20 litra naftë, do t’i duhet të paguajë 3680 lekë nga e cila 2208 lekë kalojnë shtetit në formë taksash apo tarifash”,-komentoi Tabaku. Nënkryetarja e Komisionit  u ndal edhe te koncesioni i kolaudimit të pompave të karburanteve, duke e cilësuar si një taksë që do të rritë edhe më tej çmimin.

“Një koncesion që falë ndërhyrjes së opozitës u tërhoq përpara se të bëhej një tjetër barrë e rëndë për të ardhurat e pakta të qytetarëve”,-shtoi Tabaku. Megjithatë, ky koncesion nuk është tërhequr ende nga qeveria, por thjesht është pezulluar nga Komisioni i Prokurimit Publik për shkak të ankesës së depozituar nga kompania zvicerane Penzoil Trading SA , e cila në një reagim për TV SCAN ka thënë se ankesa erdhi si pasojë e kushteve dhe kërkesave diskriminuese për kompanitë ndërkombëtare.

Sipas legjislacionit në fuqi, në këto raste KPP del me vendimin për pezullim, derisa të merret vendimi përfundimtar ku mund t’i jepet të drejtë operatorit që ka depozituar ankesën ose autoritetit kontraktor, i cili në këtë rast lejohet të vazhdojë garën. Ndërkaq, sipas Tabakut, e vetmja rrugë për uljen e çmimit të naftës është aplikimi i taksës së sheshtë dhe thjeshtimi fiskal.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.