Draghi i kërkon ndihmë qeverive – “Duhen stimuj fiskalë në nivel të Eurozonës. BQE do bëj të vetën”

Presidenti i Bankës Qendrore Europiane, Mario Draghi, i bëri thirrje vendeve të Eurozonës për stimuj fiskalë që synojnë nxitjen e investimeve, duke thënë se masat e ndërmarra deri më tani janë të pamjaftueshme.

Draghi, që do zëvendësohet nga ish-shefja e Fondit Monetar Ndërkombëtar Christine Lagarde muajin e ardhshëm,  u përpoq të bindë qeveritë e Eurozonës që të nxjerrin ekonominë nga “ngërçi”, duke ecur në të njejtën vijë me stimujt e Bankës Qendrore Europiane.

“Përgjigja më efektive do të jetë prezantimi i stimujve të orientuara tek investimet, në nivel të Eurozonës.  Kjo do ishte mënyra më e mirë për të shpërndarë në mënyrë efiçente shpenzimet e 19 vendeve, prandaj dhe kam bërë thirrje për një instrument fiskal të zonës euro”, është shprehur Mario Draghi.

Ministrat e Financave të Eurozonës nuk po planifikojnë ndonjë plan të shpenzimeve të përbashkët, por kanë thënë se janë gati për të vepruar nëse ekonomia pëson tkurrje. Draghi përgëzoi buxhetin e Eurozonës që do prezantohet në vitin 2021, duke e cilësuar si drejtimin e duhur, por shtoi se është i pamjaftueshëm në përmasë apo projektim.

Ai tha se investimet publike në nivel kombëtar do ndihmonin gjithashtu.  Draghi, duke përmendur një studim të BQE, tha se rritja e investimeve produktive publike në Gjermani me 1% për 5 vite, do të nxisnin ekonominë me rreth 2%. Por edhe nëse kjo dështon, Draghi përsëriti gatishmërinë e BQE për politikat e veta të stimujve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.