Emigrantët ‘leksion’ Italisë-‘Dracula’ bëhet ‘Caritas’, restoranti ofron 1 muaj ushqim falas për ata që nuk kanë mundësi
Në Tivoli-Itali është një restorant “Taverna e Draculas” që sikurse shkruhet është bërë ”Caritas” për 1 muaj për ata që kanë nevojë për ushqim dhe që janë në vështirësi. Të parët që kanë vuajtur pasojat e karantinës kanë qenë restorantet dhe lokalet dhe në fakt kjo iniciativë solidariteti konsiderohet e papritur. Restoranti menaxhohet nga disa rumunë dhe është i specializuar në kuzhinën tradicionale rumune.
“I mirëpresim personat që kanë nevojë për ushqim të ngrohtë nga ora 12:30 deri në orën 14:30, duke respektuar normativat e Covid-19 nga 10 nëntori deri me 3 dhjetor. Mos hezitoni të hyni, nuk do të gjykoheni nëse keni uri apo nëse jeni të një kombësie tjetër” shkruhet në tabelën jashtë restorantit.
Në fakt, ky restorant në platformën ‘Trip Advisor’ ku jepen dhe vlerësimet nga klientët, konsiderohet si një nga restorantet më të mira të zonës dhe ka marrë vlerësimet maksimale.
Një personazh i njohur në Itali i ka bërë një foto tabelës së restorantit duke e postuar në rrjetet sociale me përshkrimin”: Restorantin e menaxhojnë disa rumunë, por kjo nuk ka rëndësi. Mund të ishin italianë, senegaleze, turkë apo aztekë.
Mesazhi është që kjo është mënyra për të qenë një komunitet. Mesazhi është që ndihmojmë njëri-tjetrin. Komplimente ju dhe faleminderit për atë që bëni dhe për këtë mesazh të shkëlqyer që i jepni të gjithë Italisë”.
Fotografia më pas u përhap derisa arriti në median kombëtare ndërsa faqja në Facebook e restorantit është përmbysur nga mesazhet e vlerësimit për nismën e bukur të ndërmarrë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.