Europa nis rimëkëmbjen e ngadaltë. Treguesi i ndjesisë ekonomike përmirësohet në muajin Qershor
Besimi ekonomik po rikthehet në mënyrë të ngadaltë në Eurozonë, ku kompanitë nga manifaktura e deri tek shitësit me pakicë, po rimëkëmben nga masat shkatërruese të karantinës së koronavirusit. Treguesi i ndjesisë ekonomike i Komisionit Europian, u rrit në muajin Qershor, pavarësisht se rezultoi poshtë pritshmërive të ekonomistëve dhe shumë poshtë niveleve të fillimit të vitit. Raporti, ashtu si shumë të tjerë të ngjashëm, tregon se rimëkëmbja e plotë është ende larg.
Eurozona pritet të tkurret me mbi 8% këtë vit dhe presidentja e Bankës Qendrore Europiane, Christine Lagarde, ka paralajmëruar se pandemia do të ndryshojë pjesë të ekonomisë përgjithmonë. Deri më tani. Besimi ka rifituar thuajse 30% të humbjeve të Marsit dhe Prillit së bashku, ku masat e karantinës ndaluan jetën publike.
Ndërkohë që këto limite po hiqen gradualisht, përhapja e vazhdueshme e infeksionit në shumë pjesë të Europës, si dhe në Amerikë, po shërben si paralajmërues se sa shpejtë mund të ndryshojë situata. Qindra mijëra punëtorë po përballen me papunësi, me kompani nga Deutsche Lufthansa e deri tek prodhuesi i avionëve, Airbus, që kanë shkurtuar vende të punës.
Raporti i komisionit tregoi se pritshmëritë për punësimin në Eurozonë janë përmirësuar nga nivelet rekord të ulëta, por për disa sektorë qëndrojnë ende në 60% poshtë nivelit përpara virusit. Besimi konsumator u përmirësua në Qershor, ndërkohë që ekonomitë familjare presin një rimëkëmbje të situatës së përgjithshme ekonomike. Treguesi i ndjesisë ekonomike u rrit në thuajse të gjitha industritë dhe ekonomitë e Eurozonës.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.