“Europa të flasë me një zë” – Juncker: Të fuqizojë prezencën në botë, ndërkohë që SHBA tërhiqet
Bashkimi Europian duhet të shtojë prezencën si fuqi botërore ndërkohë që Shtetet e Bashkuara po tërhiqen nga paktet ndërkombëtare, sipas presidentit të Komisionit Europian, Jean-Claude Juncker. Në fjalimin vjetor të Unionit në Parlamentin Europian në Strasburg, që është edhe i fundit për të, Presidenti i Komisionit tha se nëse bashkohet, Europa është një superfuqi që nuk mund të injorohet. “Kur Europa flet me një zë, ne mund të imponojmë pozitën tonë ndaj të tjerëve”, tha Juncker.
Bashkimi Europian ndodhet ende në vështirësi nga dalja e Britanisë, rritja e nacionalizmit, emigracioni dhe konfliktet mbi vlerën e demokracisë me liderët e partive të djathta në Lindje si Viktor Orban i Hungarisë. Megjithatë, Juncker këmbënguli se blloku është më i unifikuar se ç’duket. Ish kryeministri i Luksemburgut, ndërsa nis vitin e fundit në detyrë, theksoi suksesin e tij në bisedimet ne Trump për tarifat tregtare dhe vuri në dukje interesin kinez për të bashkëpunuar me Brukselin mbi tregtinë e lirë.
Juncker tha se euro duhet të promovohet më mirë si një valutë botërore, duke ngritur pyetjen se pse importet e energjisë janë të kuotuara kryesisht në dollarë, ku thuajse asnjë prej tyre nuk vjen nga SHBA. Komisioni kërkon të përfundojë paktin tregtar me Japoninë në muajin Maj dhe ka lajmëruar gjithashtu një marrëdhënie tregtare me Afrikën.
Juncker propozoi gjithashtu përforcimin e mbrojtjes kundër afrikanëve të varfër që i drejtohen Veriut, duke krijuar një kufi europian dhe roje bregdetare të drejtuar plotësisht nga Brukseli me kapacitet prej 10,000 persona, që të ndalojë emigrantët, ardhja e të cilëve ka fryrë partitë populiste.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.