Europol, aksion në shtatë vende europiane – Operacioni godet gjuhën e urrejtjes së përdorur në internet
Policia europiane ka nisur disa operacione të koordinuara në shtatë vende të Europës si pjesë e një goditje ndaj gjuhës së urrejtjes në internet dhe nxitjes së dhunës, thanë agjencia e zbatimit të ligjit të Bashkimit Europian, Europol dhe prokurorët gjermanë.
Në Gjermani, policia ka kontrolluar 83 apartamente dhe ndërtesa të tjera për të kapur prova si smartphone dhe laptopë. Prokurorët thanë se 96 të dyshuar po merren në pyetje në lidhje me postimet e urrejtjes që ata bënë në internet.
Një nga të dyshuarit akuzohet për bërjen e komenteve antisemitike ndërsa një tjetër fyente një politikane femër në internet, thanë prokurorët në rajonin gjerman të Rheinland Palatinate në një deklaratë.
Operacionet janë pjesë e një përpjekje vjetore të filluar nga prokurorët gjermanë, të bashkuar këtë vit për herë të parë nga Italia, Franca, Greqia, Norvegjia, Britania dhe Republika Çeke nën koordinimin e Europol.
Bastisjet janë përqendruar në postimet në internet që promovojnë racizmin dhe ksenofobinë, tha një zëdhënës i Europol.
Gjermania ka disa nga ligjet më të ashpra të botës për shpifjen, nxitjen për të kryer krime dhe kërcënimet e dhunës, me dënime me burg për mohimin e Holokaustit ose nxitjen e urrejtjes ndaj pakicave.
Një ligj gjerman në fuqi që nga viti 2018 kërkon që rrjetet sociale të fshijnë ose bllokojnë përmbajtjen e qartë kriminale brenda 24 orëve nga marrja e një ankese ose të përballen me një gjobë të rëndë.
Legjislacioni është parë nga afër ndërsa shqetësimet rriten globalisht për postimet që përmbajnë gjuhën e urrejtjes, por ai ka pasur një ndikim të kufizuar dhe nuk e ka ndalur gjuhën e urrejtjes në internet në Gjermani, fajësuar për ndihmën për të nxitur një valë sulmesh raciste në vitin e fundit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.