FMN “rrëzon” qeverinë shqiptare! Borxhi publik nuk ka zbritur nën 70%, është 260 mln euro më i lartë
Pas përfundimit të vizitës në Tiranë, ekipi monitorues i FMN për Shqipërinë ka publikuar edhe një raport të plotë dhe të zgjeruar për vendin tonë. Ajo që bie në sy është një përplasje shifrash me qeverinë shqiptare, sa i përket borxhit publik, një temë e prekur edhe nga vetë Kontrolli i Lartë i Shtetit.
FMN në raport duket se e rrëzon qeverinë shqiptare pasi thotë se, borxhi publik nuk ka zbritur as në 2017 dhe as projektohet të ketë rënë në 2018, nën 70% të Prodhimit të Brendshëm Bruto. Ndërkohë që qeveria projekton se borxhi ka rënë në 69.9% të PBB në 2017, FMN thotë se atë vit, borxhi publik ishte në 71.8% të PBB, pra thuajse 2 pikë përqindje. Kjo përkthehet në rreth 260 milionë euro më shumë. Edhe për vitin që sapo lamë pas, FMN thotë qartë se, borxhi publik projektohet të ketë rënë në 70.5% të PBB.
Pra, jo më poshtë se niveli prej 70%, siç pretendon qeveria shqiptare. Për vitin 2018, qeveria pretendon që borxhi të ketë zbritur në 68.9%, pra, 1.6 pikë përqindje nën vlerësimet e ekipit të Fondit Monetar Ndërkombëtar. Kontrolli i Lartë i Shtetit ndërkohë pretendon se borxhi publik në të vërtetë është më i lartë se 72% e Prodhimit të Brendshëm Bruto.
Edhe pse ky raport është bërë pas konsultimeve me qeverinë shqiptare, Fondi Monetar Ndërkombëtar tregohet i matur duke mos e përmendur aspak çështjen e përplasjes së shifrave, por duke u kufizuar vetëm te projeksionet. Objektivi i qeverisë shqiptare është që borxhi të zbresë nën 60% të Prodhimit Kombëtar brenda vitit 2021. Por, sipas FMN kjo gjë nuk ka për të ndodhur më herët se vitit 2023.
Mes rreshtave të raportit ndërkohë, FMN duket se jep edhe një shpjegim se pse vjen kjo mospërputhje e shifrave. “Ne vlerësojmë se pritshmëritë e qeverisë shqiptare, sidomos për të ardhurat, janë më shumë se optimiste”—nënvizohet qartë në raport.
Në linja të përgjithshme, FMN në raport rezervon një sërë kritikash edhe për skemën e partneritetit publik privat, ku nënvizon kërcënimet që burojnë nga të tilla projekte si dhe pasigurinë që krijojnë. Sa i përket rritjes ekonomike ndërkohë, FMN flet për një normë në 3.7% këtë vit, nga 4.2% vitin e kaluar. Kjo normë është nën projeksionet e qeverisë shqiptare që flasin për rreth 4.3% rritje, por mbi ato të Bankës Botërore që fiksohen në 3.6%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.