Franca dhe Gjermania, në rimëkëmbje. Klima e biznesit përmirësohet në dy ekonomitë më të mëdha të Europës
Morali i biznesit në Gjermani dhe Francë është përmirësuar për të 5-in muaj radhazi në Shtator, duke shtuar shpresat se 2 ekonomitë më të mëdha të Europës po rimëkëmben nga goditja e koronavirusit. Sondazhet, të publikuara nga instituti gjerman IFO dhe zyra e Statistikave në Francë, treguan se të dy vendet pritet të regjistrojnë rritje ekonomike të fortë në tremujorin e tretë, pavarësisht se perspektiva është zbehur nga rritja e numrit të infeksioneve dhe masave të reja të karantinës. Instituti IFO në Gjermani, bëri të ditur se indeksi i klimës së biznesit u rrit në 93.4 pikë nga 92.5 që ishte në Gusht. Ky ishte dhe treguesi më i lartë që prej Shkurtit, ku qëndronte në 95.9 pikë.
“Ekonomia gjermane po stabilizohet pavarësisht rritjes së infeksioneve”, – deklaroi IFO. Ekonomia gjermane u tkurr me 9.7% në tremujorin e dytë, ndërkohë që shpenzimet e familjeve, investimet e kompanive dhe tregtia kolapsuan në kulm të pandemisë. Qeveria ka prezantuar që në muajin mars një serë masash, të financuara me huamarrje rekord. Duke treguar se kundërpërgjigja e Berlinit ka dhënë efekt, morali i biznesit në manifakturë është përmirësuar ndjeshëm.
Në sektorin e shërbimeve, ndjesia ka rënë për të parën herë në 5 muaj, ndërkohë që morali i turizmit është përkeqësuar prej rritjes së rasteve me Covid-19. Për tremujorin e tretë, Ifo pret që ekonomia të rritet me 6.6%, ndjekur nga 2.8% rritje në të katërtin. Në Francë, indeksi i besimit të biznesit u rrit në 92 pikë nga 90 që ishte në Gusht, duke prekur nivelin më të lartë që prej Shkurtit, përpara se Franca të hynte në karantinë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.