Gara në Kuvend për vendin në Këshillin e Lartë të Prokurorisë, afati për kandidatët e shoqërisë civile deri me 28 shtator! Kriteret për garuesit

Kuvendi ka bërë rishpallur thirrjen për kandidatë nga shoqëria civile që janë të interesuar për të qenë anëtar të Këshillit të Lartë të Prokurorisë. Në thirrjen e publikuar në faqen zyrtare të Kuvendit është një vend vakant në Këshillin e Lartë të Prokurorisë nga radhët e anëtarëve të organizatave të shoqërisë civile.

“Njoftohen anëtarët e organizatave të shoqërisë civile që janë të interesuar të kandidojnë për anëtarë të Këshillit të Lartë të Prokurorisë, dhe që plotësojnë kushtet e parashikuara në nenin 152, pika 2, të ligjit 115/2016 “Për organet e qeverisjes së sistemit të drejtësisë”, që brenda datës 28 shtator 2017, të shprehin interesin e tyre përmes një kërkese me shkrim drejtuar Avokatit të Popullit”.

Krahas kërkesës me shkrim, të interesuarit bashkëngjisin, të paktën, dokumentet e mëposhtme:

a) jetëshkrimin e përditësuar;

b) një platformë personale të qëllimeve dhe objektivave që propozojnë të ndjekin në qoftë se zgjidhen;

c) formularin e vetëdeklarimit, sipas kërkesave të ligjit “Për garantimin e integritetit të personave që zgjidhen, emërohen ose ushtrojnë funksione publike”;

ç) një deklaratë përkundrejt përgjegjësisë ligjore që nuk kanë qenë anëtarë ose bashkëpunëtorë të ish-Sigurimit të Shtetit para 2 korrikut 1991 në kuptimin e ligjit “Për të drejtën e informimit për dokumentet e ish-Sigurimit të Shtetit të Republikës Popullore Socialiste të Shqipërisë”;

d) një deklaratë përkundrejt përgjegjësisë ligjore se nuk janë bashkëpunëtorë, informatorë ose agjentë të ndonjë shërbimi sekret;

dh) çdo dokument tjetër që vërteton përmbushjen e kushteve ligjore të parashikuara në nenin 152, pika 2, të ligjit 115/2016 “Për organet e qeverisjes së sistemit të drejtësisë”.

Për të kandiduar, çdo anëtar i organizatës së shoqërisë civile, duhet të plotësojë edhe kushtin e marrjes së mbështetjes nga së paku tre organizata të shoqërisë civile, që punojnë në fusha të lidhura me sistemin e drejtësisë ose të drejtat e  njeriut.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.