Gjermania drejt formimit të Qeverisë – Konservatorët e Merkel janë dakord për “koalicionin e madh” me SPD
Liderët e partisë konservatore të kancelares Angela Merkel, ranë dakord për të ndjekur “koalicionin e madh” me Social Demokratët (SPD), për të përfunduar ngërçin politik në ekonominë më të madhe të Europës. Mandati i katërt i Merkel u rrezikua një javë më parë, kur koalicioni me Demokratët e Lirë dhe Të Gjelbrit dështoi.
Nën presion për të ruajtur stabilitetin dhe shmangur zgjedhjet e reja, Social Demokratët hoqën dorë nga qëndrimi i tyre dhe ranë dakord për të biseduar me Merkel, duke rritur pritshmëritë për një koalicion tjetër të madh, që ka qeverisur për katër vitet e shkuara.
“Një aleancë e konservatorëve dhe SPD është opsioni më i mirë për Gjermaninë, shumë më mirë se një koalicion me Demokratët e Lirë apo qeverisë minoritare”, tha Horst Seehofer, kreu i Unionit Kristian-Demokrat, për Bild am Sonntag.
Sondazhet në vend tregojnë se 52% e gjermanëve janë pro koalicionit të madh. Shumë liderë europiane kanë theksuar rëndësinë e krijimit të një qeverie të qëndrueshme gjermane sa më shpejtë, në mënyrë që rajoni të diskutojë mbi të ardhmen, përfshirë propozimet e bëra nga presidenti francez Emmanuel Macron mbi reformat e Eurozonës.
Valuta europiane shënoi nivelin më të lartë në 2 muaj kundër dollarit dhe mbeti e qëndrueshme kundër shportës kryesore të valutave, prej reduktimit të shqetësimeve politike dhe prej ndjesisë tepër optimiste të bizneseve gjermane. Në nisjen e ditës së parë tregtare për këtë javë, euro qëndronte në 1.1930 kundër dollarit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.