Gjermania regjistron 50 mijë raste me COVID-19 duke shënuar një rritje ‘dramatike’ të virusit!
Gjermania ka regjistruar më shumë se 50,000 raste të koronavirusit në një ditë për herë të parë që nga fillimi i pandemisë. Sipas Institutit të Mbikëqyrjes Shëndetësore Robert Koch, ka pasur 50,196 raste shtesë me COVID-19 në 24 orët e fundit, me 235 vdekje.
Gjermania është në mesin e një numri vendesh europiane që përballen me një rritje të re të rasteve dhe ka regjistruar numër rekord të infeksioneve gjatë ditëve të fundit. Kancelarja në largim Angela Merkel e quajti të mërkurën rigjallërimin e infeksioneve në vend “dramatike”, veçanërisht të dukshme që nga tetori.
Disa spitale kanë thënë ditët e fundit se po punojnë sërish në kufijtë e tyre dhe kanë ICU aq të mbushura me pacientë COVID-19 sa nuk mund të pranojnë pacientë të rinj. Përhapja i atribuohet pjesërisht shkallës relativisht të ulët të vaksinimit të popullsisë në Gjermani, në pak më shumë se 67 %.
Disa shtete veçanërisht të prekura, si Saksonia, Bavaria dhe së fundmi Berlini, kanë vendosur kufizime të reja që synojnë njerëzit e pavaksinuar. Nga e hëna, Berlini do të ndalojë personat e pavaksinuar nga restorantet pa tarraca, bare, palestra dhe parukeri.
Një test negativ nuk do të lejojë më akses në këto vende publike nëse përdoruesit nuk janë të vaksinuar ose nuk mund të provojnë se janë shëruar nga sëmundja. Në total, pothuajse 4.9 milionë njerëz janë infektuar në Gjermani që nga fillimi i pandemisë.
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.