Gjermania “varet” nga makinat – Ekonomia tkurret me 0.2% në T3. Hera e parë që prej vitit 2015
Ekonomia gjermane është tkurrur gjatë tremujorit të tretë për herë të parë që prej vitit 2015, ndërkohë që tensionet globale të tregtisë dhe problemi vendas në industrinë e makinave, kanë frenuar nxitësin tradicional të ekonomisë që është tregtia neto. Produkti i Brendshëm Bruto i ekonomisë më të madhe të Europës ra me 0.2% në tremujorin e tretë krahasuar me të dytin, sipas zyrës Federale të Statistikave.
Megjithatë, Ministria e Ekonomisë deklaroi se rimëkëmbja do të vazhdojë në tremujorin e katërt, duke shtuar se rënia në periudhën Korrik-Shtator, ka ardhur prej prezantimit të standardeve të reja të ndotjes (ËLTP) për makinat. “Një tkurrje me 0.2% nuk është një katastrofë”, tha ministri i Ekonomisë, Peter Altmaier. Me bazë vjetore, ekonomia u rrit me 1.1% në tremujorin e tretë, poshtë projeksioneve për 1.3% rritje. Zyra e Statistikave deklaroi se rënia e PBB krahasuar me tremujorin e dytë erdhi kryesisht nga tregtia e jashtme, ndërkohë që eksportet kanë rënë dhe importet janë rritur. Tkurrja në tremujorin e tretë ishte e para që prej fillimit të 2015-ës për ekonominë gjermane.
Qeveria kishte paralajmëruar për një performancë të dobët, duke përmendur problemet në sektorin e makinave që erdhën prej rregullave të reja. Ministria e Ekonomisë bëri të ditur se problemet nga rregullat e reja të ndotjes për makinat, i kanë hequr ekonomisë gjermane 0.4%. Investitorët janë shqetësuar për ekonominë gjermane, që ndodhet në rritje për 9 vite radhazi, prej tensioneve tregtare dhe daljes së Britanisë nga Bashkimi Europian. Përveç pasigurisë nga politikat tregtare të Donald Trump, firmat shqetësohen edhe nga destabiliteti në vend, ku koalicioni i Angela Merkel ka qenë 2 herë pranë kolapsit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.