Gjermania vazhdon vrullin – Ekonomia mbështetet nga shpenzimet konsumatore, rëndon tregtia
Ekonomia gjermane u rrit me një normë më të ulët se projeksionet për tremujorin e dytë, ndërkohë që tregtia neto ngadalësoi vrullin e gjeneruar nga shpenzimet e forta të ekonomive familjare dhe shtetit.
Zyra Federale e Statistikave raportoi se Produkti i Brendshëm Bruto u rrit me 0.6%, nga 0.7% që vlerësonin gjerësisht analistët. Megjithatë, norma e rritjes për tremujorin e parë u rishikua në 0.7%, nga 0.6% që u vlerësua më parë.
Të dhënat vijnë ndërsa Gjermania i afrohet zgjedhjeve të 24 Shtatorit, me sondazhet që tregojnë se Merkel është në avantazh ndaj sfiduesit Social Demokrat, Martin Szhulz me 17 pikë.
Partia e saj po përfiton nga rritja e qëndrueshme ekonomike. Me bazë vjetore, ekonomia më e madhe e Europës u rrit me 2.1% në tremujorin e dytë. Sipas zyrës Federale të Statistikave, rritja ekonomike u nxit nga kërkesa e brendshme, ndërkohë që konsumatorët dhe Qeveria kanë rritur shpenzimet e tyre.
Investimet në pajisje dhe ndërtim kontribuuan gjithashtu, ndërsa tregtia ndikoi negativisht, ndërkohë që importet tejkaluan bindshëm eksportet.
Analistët thonë se vlerësimi i euros me më shumë se 12% këtë vit, ka ndikuar te performanca e dobët e tregtisë. Ndërkohë që të dhënat erdhën poshtë projeksioneve, valuta e përbashkët europiane ra në 1.1740 kundër dollarit amerikan, nga rreth 1.18 që qëndronte në hapje të sesionit tregtar.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.