Gjuha shqipe në Maqedoni – Rama e Basha përshëndesin miratimin e ligjit
Kuvendi i Maqedonisë ka miratuar sot ligjin për përdorimin e gjuhës shqipe në institucione me 69 vota pro dhe asnjë kundër apo abstenim. Ndërkohë, deputetët e VMRO – DPMNE-së nuk morën pjesë në votim.
Kryeministri Edi Rama përmes një postimi në profilin e tij në ‘Facebook’ e ka cilësuar këtë një arritje historike.
“Miratimi nga parlamenti në Shkup i ligjit të gjuhës shqipe një arritje historike për shqiptarët që demokratizon e forcon vetë Maqedoninë”, shkruan Rama.
Miratimin e ligjit të gjuhës shqipe e ka përshëndetur edhe kreu i Partisë Demokratike, Lulzim Basha. Sipas tij, ky është një hap i rëndësishëm në realizimin e statusit të gjuhës shqipe në Maqedoni.
“Përshëndes këtë hap si një sukses i bashkërendimit dhe bashkëpunimit të faktorit politik shqiptar në Maqedoni. Vlerësoj qëndrimin e forcave politike maqedonase që mbështetën me votën e tyre këtë ligj, i bindur se kjo votë është një kontribut i rëndësishëm për bashkëjetesën etnike dhe konsolidimin e një shoqërie demokratike në Maqedoni.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.