Gjyqet në Apel, 480 ditë – Ballanca: Vonesat do përkeqësohen dy vitet e ardhshëm. Vishaj: Jemi në anomali, kambana alarmi
Një studim i kryer nga INFOÇIP ka zbardhur se një qytetari i është dashur të presë mesatarisht 355 ditë për shqyrtimin e dosjes së tij në Gjykatën e Apelit të Tiranës në vitin 2016, pritje që në vitin 2019 është zgjatur në 480 ditë. Gerti Shella Drejtori i INFOÇIP, e lidh zgjatjen e afateve me shkarkimet e shumta të gjyqtarëve nga procesi i Vetting-ut. Gjatë prezantimit të rezultateve të studimit të kryer në 6 gjykata apelesh, Shella tha se Vetting-u ka larguar nga sistemi përmes shkarkimeve apo dorëheqjeve 60% të magjistratëve që i janë nënshtruar procesit të rivlerësimit.
Avokatja e Popullit Erinda Ballanca tha se situata e vonesave pritet të përkeqësohet edhe më tej, të paktën për dy vitet e ardhshme.
Avokati Saimir Vishaj, Anëtar i Këshillit të Mbikëqyrjes së Reformës në Drejtësi, tha se sistemi gjyqësor gjenden në anomali për shkak të mungesës së gjyqtarëve dhe se problemi i vonesave të dosjeve duhet parë si një kambanë alarmi për drejtësinë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.