Greqia drejt fundit të ndihmave – Dakordësi me kreditorët mbi reformat, nën programin e “fundit”

Greqia dhe kreditorët e Eurozonës arritën një marrëveshje paraprake këtë fundjavë për reformat që Athina duhet të ndërmarrë nën programin e shpëtimit, një lëvizje që mund t’i hapë rrugën vendit për daljen nga ndihmat ekonomike në Gusht 2018.

Marrëveshja, mbi një serë masash të ndjeshme politike, që mbulojnë çështje fiskale, reforma në tregun e punës dhe energji, kreditë e këqija si dhe privatizimet, mund të kanalizojnë kredi të reja dhe ta çojnë Greqinë drejt rikthimit në financimin e plotë në tregje.

“Vizita e institucioneve ka përfunduar. Ne arritën një marrëveshje në nivel stafi”, tha ministri grek i Financave, Euclid Tsakalotos.

“Institucionet Europiane kanë arritur një marrëveshje me autoritetet greke mbi paketën që mbështet programin e Mekanizmit Europian të Stabilitetit”, deklaruan zyrtarët europianë.

Kjo dakordësi duhet të miratohet nga ministrat e financave të Eurozonës, që pritet të takohen të Hënën më datë 4 Dhjetor. Pasi të përfundojë rishikimi i programit të shpëtimit, pritet të ç’bllokohen rreth 5 miliardë euro, nën programin aktual prej 86 mld euro në total, që është i treti që prej 2010-ës.

Zyrtarët europianë thanë se kjo mund të arrihet deri në fund të Janarit, nëse bisedimet zhvillohen pozitivisht.

Vetëm 1 rishikim i reformave mbetet deri në fund të programit në muajin Gusht, që shënon daljen përfundimtare të Greqisë nga ndihmat.

Pas 7 vitesh, ku janë arritur 3 programe shpëtimi me vlerë 270 miliardë euro, Greqia shpreson se programi aktual të jetë i fundit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.