Heqja e bilanceve të dyta – Kredia për biznesin është rritur për 2-mujorin

Detyrimi për të dhënë kredi vetëm bazuar në bilancet zyrtare të biznesit për momentin nuk duket të ketë pasur ndonjë impakt dramatik në kreditimin e ndërmarrjeve private. Sipas të dhënave nga Banka e Shqipërisë, për dy muajt e parë të vitit sistemi financiar ka dhënë 26.7 miliardë lekë kredi të reja për biznesin, 2.3% më shumë krahasuar me të njëjtën periudhë të një viti më parë.

Kjo shifër është e papastruar nga efekti i zhvlerësimi të euros në kursin e këmbimit me lekun. Duke pasur parasysh se euro ka rënë me afro 5% krahasuar me një vit më parë, kjo e ka ulur vlerën e kredisë së re në euro për biznesin gjatë këtij viti, të konvertuar dhe llogaritur në lekë.

Rritja më e lartë raportohet në sektorët e tregtisë dhe ndërtimit, ndërsa një rënie të lehtë ka pësuar kredia për industrinë përpunuese.

Në fillim të këtij viti, hyri në fuqi detyrimi që bankat të kreditojnë bizneset vetëm mbështetur mbi pasqyrat financiare zyrtare. Kjo masë ka qenë pjesë e planit për uljen e kredive me probleme, miratuar në vitin 2015. Hyrja në fuqi e këtij kufizimi ka shkaktuar shqetësime për bizneset, por edhe për bankat, me argumentin se mund të jetë një pengesë për të rritur kreditimin.

Madje, bankat kanë kërkuar rregulla më të qarta nga Banka e Shqipërisë, lidhur me hapësirat që ato mund të kenë për të bërë vlerësime shtesë lidhur me gjendjen financiare të biznesit, përtej asaj që tregojnë bilancet tatimore. Sidoqoftë, shifrat tregojnë se në muajt e parë të vitit kreditimi i biznesit nuk është prekur në mënyrë drastike nga hyrja në fuqi e rregullave të reja.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.