Italianët “monopolizojnë” rrugët – Ofertë spanjollëve, pranë krijimit të kompanisë nr.1 në botë

Atlantia i ka bërë një ofertë prej 16.34 miliardë eurosh shoqërisë spanjolle, “Abertis”, me qëllimin për të krijuar operatorin më të madh në botë të menaxhimit të tarifave të rrugëve.

Në rast se spanjollët do ta pranonin ofertën, atëherë kompania e re do të ishte më e madhja në botë, duke pasur nën menaxhim 14 mijë kilometra rrugë.

Kompania spanjolle ndërkohë, gjeneron një të tretën e fitimeve në Francë, ndërkohë që ka një shtrirje mjaft të gjerë edhe në Amerikën latine.

Në këtë mënyrë, italianët e Atlantia do të gjeneronin 60% të fitimeve të tyre jashtë Italisë. Kompania italiane që operon në sektorin e menaxhimit të rrugëve kontrollohet nga familja Benetton.

Spanjollët nga ana tjetër shumë shpejt do të gjenden përballë afatit të përfundimit të koncesioneve më të mëdha.

Përfaqësues të Atlantia shprehen të bindur se marrëveshja do të arrihet.

Credis Suisse dhe Mediobanka kanë luajtur rolin e këshilltarëve financiarë për italianët, ndërkohë që për vlerësimin e borxhit janë përfshirë edhe BNP Paribas, Unicredit apo Intesa Sanpaolo.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.