Johnson teston shumicën në parlament-Deputetët mbështesin paketën e Brexit duke i hapur rrugën 31 Janarit
Kryeministri i Britanisë, Boris Johnson, testoi me sukses shumicën e re në parlament, ndërkohë që deputetët miratuan paketën e tij të Brexit, ç’ka e drejton vendin jashtë Bashkimit Europian më 31 Janar.
Parlamentarët ranë dakord ndaj legjslacionit në parim dhe tashmë do të debatohet nga të dy dhomat e parlamentit në fillim të vitit të ardhshëm. Megjithatë, kalimi duket i thjeshtë ndërkohë që 358 deputetë e mbështetën dhe 234 votuan kundra.
Ndryshimet e paketës së Brexit shihen si kontradiktore nga shumë persona. Ligji i ri do të përjashtojë çdo zgjatje të periudhës së tranzicionit, që do të vazhdojë deri më 31 Dhjetor 2020.
Kjo do të ngushtojë kohën që Britania ka për të arritur një marrëveshje tregtare me Bashkimin Europian, ç’ka rrit shanset e Brexit pa marrëveshje. Ndryshime të tjera përfshijnë shtimin e gjykatave britanike që mund të rikonsiderojnë ligjet e ndërmarra nga Gjykata Europiane e Drejtësisë.
Një klauzolë mbi të drejtat e punëtorëve është hequr, pavarësisht se Qeveria kë bërë të ditur se kjo çështje do të jetë pjesë e një ligji të ri. Nëse paketa kthehet në ligj, Britania do të dalë nga Bashkimi Europian më 31 Janar, 3 vite e gjysmë pas referendumit të 2016-ës.
Në Tetor, parlamenti britanik miratoi fillimisht ligjin, por refuzoi afatin e shkurtër kohor për ta ratifikuar, ç’ka solli edhe zgjedhjet e përgjithshme në vend. Paraardhësja e Johnson, Theresa May, dështoi 3 herë në kalimin e paketës së saj të Brexit dhe dha dorëheqjen në 7 Qershor të këtij viti.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.