Karburant me squfur e gaz jashtë normave – ISHTI gjobit 12 subjekte në 2 muaj, vlera totale e masave administrative 10.13 mln lekë
12 subjekte të tregtimit me shumicë dhe pakicë të karburanteve dhe të lëndëve djegëse, pajisjeve nën presion dhe instalimeve elektrike janë gjobitur nga Inspektorati Shtetëror Teknik dhe Industriale përgjatë periudhës janar-shkurt, teksa vlera totale e masave administrative arrin 10.13 mln lekë. Ajo që bie në sy është fakti se numri më i lartë masave administrative është vendosur ndaj atyre subjekteve që tregtojnë karburant jashtë normave të lejuara, pasi konstatohet se ka shmangie në parametrat cilësore për produktin Gaz i lëngshëm, për përdorim për qëllim rezidencial.
Gjithashtu, me gjobë është penalizuar edhe një subjekt, që tregton karburant jashtë normave të lejuara pasi konstatohet se ka shmangie në parametrat cilësorë për produktin gazoil, konkretisht për treguesin “squfur”, konstatuar kjo sipas furnizimeve të kryera ndaj shoqërisë “Antea Cement”, e cila përfshihet sipas ligjit në kategorinë e subjekteve “konsumator i madh”. Shkaqet e tjera të gjobave lidhen me mungesën e dokumentacionit tekniko-ligjore, shfrytëzimi i pajisjeve nën presion të paregjistruara, etj.
Megjithatë, pavarësisht gjobitjeve të herë pas hershme, ky dikaster duket se ka hasur vështirësi në mbledhjen e të gjitha detyrimeve nga subjektet. Vetëm pak kohë më parë ky dikaster publikoi listën e debitorëve, duke filluar nga vitit 2007 e deri në vitin 2020, duke renditur të gjithë subjektet publikë, privatë apo individë, të cilët nuk kanë likuiduar detyrimet e që për pasojë rezultojnë borxhlinj ndaj këtij institucioni. Vlera totale e këtyre detyrimeve arrinte në 127.6 mln, ndërkohë që 2020-a është viti me detyrimin më të lartë të papaguar, me 29.8 mln lekë, ndërkohë që pas tij vjen viti 2015 me 18.9 mln lekë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.