Ankesat për furnizimin me energji – ERE, detyrime të reja për FSHU-në, mbi informimin e ankuesve

Furnizuesi i Shërbimit Universal do të duhet të njoftojë brenda 5 ditëve pune këdo që paraqet një ankesë me postë, për kodin e regjistrimit, datën e parashikuar për zgjidhjen e ankesës dhe mënyrën e komunikimit që do të ndiqet në vazhdimësi me ankuesin”. Kjo është një prej detyrimeve që i lindin kompanisë së krijuar nga ndarja e Operatorit të Shpërndarjes së Energjisë Elektrike, nga rregullorja e re mbi Standardet e Trajtimit të Ankesave të Klientëve të Energjisë Elektrike dhe Gazit Natyror.

Gjithashtu, sipas rregullores, pas hetimit, FSHU duhet të informojë ankuesin me shkrim, në mënyrë elektronike apo me sms, për veprimet e ndërmarra për të zgjidhur ankesën dhe për të shmangur problemin. Furnizuesi i Shërbimit Universal kërkoi ndryshime në këtë drejtim, por kërkesa nuk u miratua nga Enti Rregullator i Energjisë. Sipas të dhënave zyrtare, janë rreth 101 mijë kërkesa dhe ankesa që u depozituan pranë Furnizuesit të Shërbimit Universal për 9-mujorin e vitit 2020.

Peshën kryesore të ankesave e zë ndryshim i të dhënave të kontratës me 40% të totalit, ndërsa në vendin e dytë renditen ankesat për faturim në masën 31%. Pas tyre vijnë ankesat për ndryshim matësish në masën 25%, për cilësi shërbimi 2.3% dhe ankesa për kreditime në 1.1%. Kompania e ka konsideruar të ulët numrin e ankesave në raport me numrin e faturave të emetuara gjatë kësaj periudhe. Sipas FSHU, mesatarja mujore e ankesave, ndaj numrit total të faturave të emetuar është më e vogël se 0.3%.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.