Kërkesa në rritje për standard – 6 mujori i dytë: Do miratohen 1209 standarde të reja

Kërkesat e shumta  nga biznesi vendas për të prodhuar dhe shërbyer sipas  standardeve evropiane dhe ndërkombëtare  ka  bërë që numri i standardeve të shitura nga viti në vit ka ardhur duke u rritur.

Kështu referuar të dhënave zyrtare nga Drejtoria e Përgjithshme e Standardeve, gjatë 6-mujorit të dytë të vitit 2017,  kjo drejtori do të miratojë 1209 standarde dhe dokumente standardizimi shqiptare, nga të cilat 981 janë me origjinë Evropiane (CEN, CLC dhe ETSI) dhe 228 Ndërkombëtare (ISO dhe IEC), për të cilat do të punojnë rreth 62 Komitete Teknike.

Standardet e adoptuara janë gjykuar që janë më të përdorshmit dhe më të domosdoshmit në ekonominë shqiptare.

Ndërkohë  hartimi dhe adoptimi i standardeve konsiston në nevojat që kanë ndërmarrjet prodhuese dhe të shërbimit, pavarësisht nga forma dhe madhësia e tyre, pasi e bëjnë për të për t’u siguruar standarde të cilat plotësojnë nevojat e tyre për cilësi dhe aftësi konkurruese më të madhe në treg.

Aktualisht çmimet e standardeve shqiptare (SSH) janë afërsisht sa 30 për qind e çmimeve të standardeve ndërkombëtare.

Çmimi për një standard shqiptar varion nga 1190 lekë – 25882 lekë.

Standardet më të kërkuara në Shqipëri janë standardet e ndërtimit, të naftës dhe benzinës, standardet e menaxhimit të cilësisë për kompetencën e laboratorëve të provave dhe të kalibrimit , etj.

Ndër standardet më të kërkuara në botë është standardi ndërkombëtar ISO 9001 për Sistemet e Menaxhimit të Cilësisë, i cili është përdorur nga mbi 1.1 milion organizata në mbi 170 shtete dhe ekonomi të ndryshme të globit.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.