Klima e biznesit në Tiranë – Çdo muaj regjistrohen 260 sipërmarrje të reja
Rreth 260 biznese të reja regjistrohen çdo muaj në kryeqytet, për t’iu bashkuar sipërmarrjeve të tjera. Të dhënat vijnë nga Drejtoria e Përgjithshme e Taksave dhe Tarifave Vendore në Bashkinë Tiranë ku bëhen edhe procedurat për regjistrimin e bizneseve të reja.
Me reformën e re administrative territoriale dhe kalimin e disa komunave në varësi të Bashkisë, numri i bizneseve te reja është rritur ndjeshëm. Ndërkohë që parashikohen shifra më të larta, për shkak se nga 1 Janari 2017 kanë hyrë në fuqi masat për reduktimin e procedurave tatimore dhe shkurtimin e afateve në zyrën vendore të taksave, pasi jo pak herë burokracitë e shumta janë bërë shkak për stepjen e iniciativave të qytetarëve për të ngritur një biznes.
Kështu, nga fillimi i këtij viti, rreth 50 mijë biznese që veprojnë në qytetin e Tiranës, i janë gëzuar lajmit për zgjidhjen e gjashtë kërkesave të tyre, siç është lehtësimi i procedurave dhe shkurtimi i afatit për pajisje me vërtetim për likuidim detyrimesh, procedura për kërkesë/ankesë on-line. Lehtësi për procedurën e verifikimit në terren, për trajtimin e kërkesë-ankesave në aspektin juridik të bizneseve si dhe për për rimbursimin e shumës së paguar tepër në llogari bankare.
Për të përmirësuar edhe më tej klimën e biznesit, Bashkia e Tiranës ka lehtësuar edhe procedurën e regjistrimit të një biznesi të ri pranë zyrës vendore të taksave, duke përgjysmuar paralelisht edhe afatet e regjistrimit. Ndërkohë gjatë këtij viti bizneset e kryeqytetit nuk janë përballur me rritje të tarifave dhe taksave vendore.
Elisabeta Dosku/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.