KPP “rrëzon” institucionet për bursën e energjisë – Pranon ankesën e kompanisë sllovake, i hapet rruga zhvillimit të tenderit

Komisioni i Prokurimit Publik ka pranuar disa prej ankesave të kompanisë sllovake Sfera, për tenderin e bursës së energjisë, që pretendonte se kërkesat e tenderit ishin diskriminuese dhe në kundërshtim me legjislacionin në fuqi. Vendimi i KPP-së është marrë në datën 22 nëntor, ndërsa detyron autoritetin kontraktor, që në këtë rast është Bursa Shqiptare e Energjisë Elektrike – ALPEX, të kryejë modifikimet përkatëse në dokumentet e tenderit, si dhe të njoftojë KPP-në mbi zbatimin e vendimit brenda 5 ditësh.

Me këtë vendim, i hapet rruga zhvillimit të tenderit për ngritjes e bursës së energjisë, që është një prej instrumenteve më të rëndësishëm për tregun elektroenergjetik. Sipas ankesës së depozituar  në KPP “Sfera” besonte se kriteret e tenderit kishin karakter diskriminues dhe efekt të mbylljes së tregut, pasi përjashtojnë pa ndonjë justifikim të arsyeshëm, shumicën e ofertuesve të mundshëm të shërbimeve që kanë kapacitetin e nevojshëm teknik dhe menaxherial dhe mund të menaxhojnë me efikasitet funksionimin e përditshëm të segmenteve të tregut të organizuar njëditore dhe intraday në Shqipëri dhe Kosovë dhe bashkimin e tyre.

Ndërkaq, pas vendimit të KPP-së, referuar procedurave standarde, tashmë tenderi do të duhet të rihapet me kriteret e rinj të kërkuar nga KPP, ndërkohë që vetëm pas finalizimit me sukses të tij do të mundësohet ngritja e Platformës Elektronike e Tregtimit për Tregun e Ditës në Avancë dhe atë Brenda të njëjtës Ditë, për Operimin e Tregut të Organizuar në Shqipëri dhe Kosovë.

Kjo në rastin kur palët nuk e ankimojnë vendimin e KPP-së në gjykatë. Ngritja e bursës së energjisë nënkupton listimin e prodhuesve të energjisë elektrike, çka do të rrisë konkurrencën si dhe do të lehtësojë blerjen e energjisë nga të gjithë bizneset e liberalizur që sigurojnë vetë sasinë e nevojshme të energjisë. Ngritja e saj ka tejkauar çdo afat ligjor, ndërkohë që shpejt do të nisë edhe dalja në treg të lirë e bizneve të lidhur në tensionint 20 KV, të cilët përbëjnë një numër të konsdiderueshëm të abonentëve.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.