Ecuria e vaksinimit për COVID-19 – Nuk përmirësohet renditja, Shqipëria e parafundit në rajon për doza/100 banorë
Pavarësisht uljes së fashës së moshës, fillimit të aplikimit të dozës së tretë apo vendosjes së kushteve për paraqitjen e testit PCR në mënyrë periodike për punonjësit e shëndetësisë, mësuesit dhe studentët, vendi ynë renditet nën mesataren europiane për doza të administruara për 100 banorë. Sipas të dhënave të Our World in Data, të përditësuara në datën 25 nëntor, Shqipëria rezulton se ka kryer 72.46 doza për 100 banorë, ndërkohë që mesatarja e vendeve të Evropës regjistrohet në 125.61 doza për 100 banorë.
Sa i takon vendeve të Bashkimit Evropian, mesatarja rezulton të jetë 141.47 doza për 100 banorë, ndërsa sa i takon renditjes në vendet e rajonit, Shqipëria lihet pas nga Serbia, Mali i Zi, Maqedonia e Veriut, por edhe Kosova që e filloi procesin e vaksinimit shumë më vonë se vendi ynë. Sipas të dhënave, vetëm Bosnje Hercegovina kanë realizuar më pak vaksinime se Shqipëria. Deri në datën 29 nëntor, sipas Ministrisë së Shëndetësisë janë realizuar 2,096,897 doza të vaksinës për COVID-19, nga të cilat 1,071,871 doza të para, 959,555 doza të dyta dhe 65,471 janë doza të treta.
Sipas ekspertëve rolin kryesor në nivleine ulët të vaksinimit në vendin tonë e ka aplikimi i vaksinave që nuk janë certifikuar nga Agjencia Evropiane dhe Amerikane e Barnave. Por, sipas Ministrisë së Shëndetësisë, vaksina kineze është e lejuar për përdorim nga Organizata Botërore e Shëndetësisë.
Aktualisht, vaksinimi ndaj COVID-19 është i hapur për të gjithë personat mbi 16 vjeç si dhe fëmijët mbi 12 vjeç me probleme të sistemit imunitar. Sipas Ministrisë së Shëndetësisië çdo qytetar mund ta kryejë vaksinën kudo në qendrat shëndetësore apo në pikat e vaksinimit të përqëndruar, duke u paraqitur me kartën e identitetit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.