Kredia rritet edhe në shkurt – Viti 2019 ka nisur më pozitiv
Kredia u rrit për të dytin muaj radhazi gjatë shkurtit, duke konfirmuar nisjen pozitive të viti 2019. Sipas Bankës së Shqipërisë, për shkurtin kredia arriti në 541.5 miliardë lekë, në rritje me afërsisht pesë miliardë lekë. Me bazë vjetore kredia për ekonominë ngelet në rënie, me 1.5% krahasuar me një vit më parë. Megjithatë, duke qartë se rënia është ngushtuar ndjeshëm, ndërsa duke përjashtuar efektin e kredive të fshira dhe kursit të këmbimit, portofoli i kredisë për ekonominë do të ishte në rritje me rreth 6%.
Gjallërimi i kredisë në muajt e parë të vitit ka ardhur sidomos falë segmentit të biznesit. Kredia për kompanitë private u rrit me rreth shtatë miliardë lekë në dy muaj. Për shkak se biznesi thith volumet më të mëdha të kredisë, ky segment ngelet përcaktues për ri ngritjen e huadhënies për ekonominë shqiptare. Kredia për biznesin përbën afërsisht 60% të kredisë totale për sektorin privat Megjithatë, tregu ka vuajtur si një rënie të kërkesës për shkak të efekteve të krizës në tregje, ashtu edhe një ofertë të shtrënguar nga bankat. Oferta më e ulët lidhet sa me kujdesin e shtuar, ashtu edhe me disa zhvillime strukturore brenda sektorit bankar. Shumë banka kanë qenë të përqendruara në procesin e shitblerjes së aksioneve, çka e ka hequr fokusin nga rritja.
Në segmentin e individëve, kreditimi ka një tendencë pozitive të qëndrueshme në kohë. Portofoli i rrit edhe gjatë shkurtit, ndërkohë që është zmadhuar me 4.4% krahasuar me një vit më parë. Normat e ulëta të interesit kanë nxitur huadhënien si në kredinë për blerje banesash, ashtu edhe në atë konsumatore.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.