Kryebashkiaku i New York-ut: “Koronavirusi është kriza më e madhe që nga Depresioni i Madh! Ushtria amerikane duhet të mobilizohet”

Bill de Blasio, Kryebashkiaku i New York i cili ka më shumë se një të tretën e rasteve të koronavirusit të gjithë SHBA-ve, të dielën e përshkroi shpërthimin si krizën më të madhe të brendshme që nga Depresioni i Madh dhe bëri thirrje që ushtria amerikane të mobilizohet për të ndihmuar që sistemi i kujdesit shëndetësor të mos mbingarkohet .

“Nëse ne nuk do të marrim më shumë ventilatorë në 10 ditët e ardhshme njerëzit do të vdesin, të cilët nuk kanë pse të vdesin,” tha kryetari de Blasio, pasi qyteti më i populluar i vendit regjistroi mbi 8000 raste të infektuar dhe 60 viktima. Rastet në mbarë vendin janë mbi 25,000 me të paktën 340 të vdekur, sipas një raporti të Reuters.

“Kjo do të jetë kriza më e madhe brenda vendit që nga Depresioni i Madh,” i tha ai CNN, duke iu referuar krizës ekonomike të viteve ’30. “Kjo është arsyeja pse ne kemi nevojë për një mobilizim në shkallë të plotë të ushtrisë amerikane.” Ai paralajmëroi se më e keqja do të vijë akoma me Prillin duke parë më keq se Marsi dhe Maji ndoshta edhe më keq.

De Blasio tha që qyteti nuk po merr mjete të nevojshme mjekësore nga qeveria federale për të luftuar përhapjen e shpejtë të sëmundjes së frymëmarrjes më vdekjeprurëse të parë ndonjëherë. “Nëse presidenti nuk vepron, njerëzit do të vdesin gjë që mund të evitohet,” i tha de Blasio NBC.

Presidenti i SHBA, Donald Trump tha në Twitter të Dielën se prodhuesit e automjeteve amerikanë Ford Motor Co, General Motors Co dhe Tesla Inc iu dha drita jeshile për të prodhuar ventilatorë dhe sende të tjera të nevojshme në mënyrë të dëshpëruar gjatë shpërthimit të koronavirusit.

Bllokimi që prek segmente të mëdha të publikut amerikan si një mënyrë për të përballuar dhe frenuar përhapjen e koronavirusit ka të ngjarë të zgjasë 10-12 javë, ose deri në fillim të qershorit, tha të dielën Sekretari i Thesarit të SHBA –ve, teven Mnuchin.

Amerikanët po përshtaten me ndryshimin më të madh në jetën e përditshme që nga Lufta e Dytë Botërore me shkolla të mbyllura, sporte të anuluara dhe trazira ekonomike ndërsa humbjet e vendeve të punës rriten me mbylljen e bizneseve në shumë industri.

Spitalet janë duke kërkuar për pajisje mbrojtëse për punonjësit e kujdesit shëndetësor dhe për ventilatorë,si njw pregatitje paraprake pwr valwn e pacientwve të cilët do të kenë nevojë për ndihmë për frymëmarrjen pasi rastet e rënda shpesh çojnë në pneumoni dhe ulje të funksionit të mushkërive.

Virusi ka vrarë mbi 13,000 globalisht dhe ka infektuar më shumë se 300,000 në mbi 170 vende. Ligjvënësit në Uashington janë afër një marrëveshje që mund të hedhë një rekord prej 1 trilion dollarësh në ekonomi për të kufizuar dëmin ekonomik nga koronavirusi. Sekretari amerikan i Thesarit Steven Mnuchin i tha “Fox News Sunday” që shpreson se Kongresi do të votojë mbi projekt-ligjin të hënën. Pagesat e propozuara për një familje mesatare prej katër personash do të ishin 3,000 dollarë dhe do të ishin vetëm një herë për tani, tha ai.

Gati një në katër amerikanë, ose 80 milion, ishin nën urdhëra të mbyllnin dyqanet dhe të qëndronin në shtëpi pasi Nju Jork, California, Illinois, Connecticut dhe New Jersey filluan mbylljen totale të vendit. “Në qoftë se ne nuk do t’u themi njerëzve që të qëndrojnë në shtëpi dhe të mos ndërveprojnë në mënyrën si ishin, ne do të shohim gjithnjë e më shumë, mijëra të tjerë, dhjetëra mijëra vdekje më shumë,” i tha Guvernatori i Illinois JB Pritzker CNN të Dielën. (Reuters)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.