“Kryqëzohet” Ministri i Shëndetësisë – Vaksina ka prodhuar përçarje me kancelaren Merkel

Në Gjermani po luhet “loja e fajësimit” për vaksinën e COVID – 19. Pyetje të shumta janë ngritur se përse ekonomia e katërt më e madhe në botë nuk ka qenë më e shpejtë në vaksinimin e njerëzve të saj.

“E vërteta është se vaksina është një produkt i pakët në të gjithë botën” tha Jens Spahn, Ministri i Shëndetësisë në Gjermani, gjatë konferencës së tij të parë për shtyp të vitit.

Spahn u shpreh ndër të tjera se Gjermania po punon së bashku me BioNTech për të hapur një vend të ri prodhimi në Marburg, i cili mund të jetë funksional që nga muaji tjetër, në mënyrë që të rrisë furnizimet globale.

Ndërkohë, sipas Ministrit gjerman të Shëndetësisë, qeveria gjermane do të marrë 50 milionë doza të vaksinës Moderna, pas miratimit nga Bashkimi Europian.

Kishte raportime që vendosmëria e Ministrit të Shëndetësisë Spahn për të porositur 400 milionë doza vaksinash, si pjesë e një aleance me kolegët e tij nga Franca, Italia dhe Holanda në Qershor të vitit të kaluar, nuk shkoi mirë me Kancelaren. Dhe, si rezultat, ai u tërhoq nga Merkel, e cila që nga ajo kohë u është lutur qytetarëve të qëndrojnë të duruar.

Në 48 orët e fundit, “loja e fatit” ka lëvizur drejt Spahn, i cili është përballur me kritika nga opozita dhe anëtarët e partnerit të koalicionit CDU, Social Demokratët (SPD.) Tabloidi i Bild madje, po raporton një përçarje midis Spahn dhe kancelarit.

Burimi origjinal: Deutsche Welle

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.