Ku po e kalojnë shqiptarët karantinën? – 71.9% në shtëpi private, vetëm 27.9% në apartamente

Distancimi social po i detyron njerëzit në thuajse çdo cep të globit të jetojnë nëpër shtëpitë e tyre. Për disa, karantina mund të jetë më e lehtë se të tjerët, në varësi të llojit të banesës. Të dhënat e Eurostat tregojnë se në Bashkimin Europian 46% e popullsisë jeton nëpër apartamente. Po në Shqipëri sa është kjo normë?

Sipas Instat, në 27.9%. 14.8% e familjeve shqiptare jeton në një pallat me më pak se 15 apartmante, që në pjesën dërrmuese i referohet pallateve përpara viteve 90-të, ndërsa 13.1% e familjeve jetojnë nëpër pallate me më shumë se 15 apartamente.

Pjesa tjetër ndërkohë, më saktësisht 71.9% e familjeve shqiptare jetojnë nëpër shtëpi private. Fakti që pjesa dërrmuese e familjeve shqiptare jetojnë nëpër shtëpi private lidhet me popullsinë rurale dhe sidomos me numrin e lartë të ndërtesave nëpër zona informale. Në Europë kjo normë fiksohet në 35% për ata ato familje që jetojnë në shtëpi private të vetme, ndërsa 19% e tyre jetojnë po në shtëpi private, por që e ndajnë atë edhe me të paktën një familje tjetër.

Për Shqipërinë norma është më e lartë edhe se vende si Holanda. Holanda dhe Irlanda kanë normat më të ulta të popullsisë që jetojnë nëpër apartamente, me 20% dhe 8% respektivisht. Ndërsa për vende si Spanja apo Greqia norma ngjitet mbi 60%.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.