Kupola e drejtësisë në kolaps – Gjykata e Lartë jashtë funksionit, kërkon kandidatë për KLGJ
Shkarkimi nga Vetting-u i Besim Trezhnjevës, i cili ka qenë edhe kandidat për Këshillin e Lartë Gjyqësor, ka detyruar Gjykatën e Lartë të riçelë garën për plotësimin e numrave të këtij organi.
Në mbyllje të sezonit gjyqësor në datën 31 korrik 2018 Gjykata e Lartë ka shpallur zyrtarisht njoftimin në lidhje me kandidatët për Këshillin e Lartë Gjyqësor nga Gjykatat e Apelit jashtë Tiranës.
Krijimi i KLGJ-së është kthyer tashmë në emergjencë, pas kolapsit të Gjykatës së Lartë, e cila ka mbetur me vetëm 4 anëtarë. Ligji e detyron këtë gjykatë të ketë së paku 5 anëtarë për të mundur të marrë vendime. Këshilli i Lartë Gjyqësor është organi që do mund të përzgjedhë anëtarët e rinj të Gjykatës së Lartë, por edhe të saj Kushtetuese, gjithashtu në kolaps të plotë, me vetëm 2 anëtarë, një prej të cilëve me mandat të përfunduar.
Sipas njoftimit Gjyqtarët e interesuar duhet të paraqesin kërkesën dhe dokumentacionin në Gjykatën e Lartë, brenda datës 15 shtator 2018 me qëllim që më pas të nisë procedura e përzgjedhjes.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.