Kush është Fontana, euroskeptiku që ka mentor Salvinin, që u bë ministër i Italisë për Europën!

Lorenzo Fontana betohet si ministër i Marrëdhënieve me Bashkimin Europian. Këtë e ka njoftuar kryeministri Giuseppe Conte.

Në drejtimin e marrëdhënieve me BE-në domethënë mbërrin një legist, besnik i Salvinit.

Një zgjedhje fort e kërkuar nga zëvëndëskryeministri. Misioni i Fontanas do të jetë ai i të treguarit kujdes për interesat italiane përballë krahut të fortë të Europës. 39 vjeçari nga Verona, është i martuar dhe ka një vajzë. Ai është aktualisht ministër për familjen dhe aftësitë e kufizuara. Katolik i devotshëm, aq sa shpeshherë ka përfunduar në shënjestrën e komunitetit LGBTI për qëndrimet që ka mbajtur për çështjen e martesës së tyre, familjes, gruas dhe besimit.

I diplomuar për shkenca politike në Universitetin e Padovas dhe për Histori në Universitetin Europian të Romës, Fontana nis të merret me politikë si këshilltar komunal në Verona. Është vetëm 22 vjeçar. Pastaj në vitin 2009, për herë të parë zgjidhet në Parlamentin Europian.

Përgjatë dy mandateve të njëpasnjëshme, në krah të Salvinit, mentorit të tij politik,  është shefi i delegacionit të grupit të Lega Nord dhe zëvëndëspresident i komisionit të kulturës në Parlamentin Europian.

Punon për të afruar Lega Nord me Front National të Marine Le Pen. Nga 7 korriku i 2017 deri me 12 qershor 2018 është zëvendës-kryebashkiak i Veronës. Marsin e vitit të kaluar u zgjodh në parlamentin italian si përfaqësues i Venetos. Në 29 mars zgjidhet zëvendës-kryeparlamentar.

Me detyrën e re, atij do t’i duhet që të jetë në qendër të diskutimeve, në një kohë që mes Italisë dhe Bashkimit Europian ka diskutime e negociata të forta lidhur me politikat ekonomike që duhen aplikuar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.