Kushtet për t’u bërë punonjës i Kompanive private të Ruajtjes së Sigurisë Fizike
Rregullat e reja për organizimin e subjekteve që operojnë në fushën e ruajtjes së sigurisë fizike (SHPSF) kanë sjellë ndryshime edhe në procedurat për emërimin e punonjësve të këtyre kompanive.
Kandidatët që duan të punojnë në këto kompani do të kalojnë në një procedurë për pajisjen me certifikatë punonjësi, për të cilën kërkesë është edhe kryerja e trajnimit.
Personeli i SHPSF-ve do të trajnohet në Akademinë e Sigurisë ose në Qendrat e Trajnimit Privat dhe ky trajnim do të zgjasë së paku 10 ditë mësimore. Trajnimet e specializuara do të kryhen për:
- a) Përgjegjës shërbimi për SHPSF-të;
- b) Operator për Qendrën e Kontrollit;
- c) Truprojë për sigurimin fizik të personave;
- d) Punonjës për shoqërimin e vlerave monetare gjatë transportit;
- e) Shofer për drejtimin në mënyrë të sigurt të mjeteve të blinduara të shoqërimit të vlerave monetare;
- f) Instruktor për përgatitje zjarri për subjektet e licencuara “Për aftësimin teorik e praktik me armët”.
Gërmat e dhe f janë trajnime që bëhen vetëm pranë Akademisë së Sigurisë.
Pasi të kenë kryer trajnimin, kandidatët do të duhet të aplikojnë për certifikatën e punonjësit, proces i cili do të kalojë përmes Komisionit të Shqyrtimit të Kërkesave për Certifikim.
Dokumentet dhe kriteret për miratimin e kandidatëve për punonjës të SHPSF:
- a) Formular aplikimi dhe autodeklarimi
- b) Fotokopje e letërnjoftimit dhe certifikatë familjare
- c) Dokumenti që vërteton përfundimin e shkollës së mesme
- d) Certifikatë e gjendjes gjyqësore
- e) Dëshmi aftësie profesionale për punonjës të shërbimit të SHPSF-së, lëshuar nga Akademia e Sigurisë ose QTP, për ata që nuk kanë qenë pjesë e strukturave të Policisë së Shtetit apo strukturat e tjera ligjzbatuese me grade policore ose ushtarake
- f) Vërtetim nga Drejtoria e Burimeve Njerëzore për motivin e daljes në lirim nga strukturat e Policisë së Shtetit apo nga strukturat e Forcave të Armatosura.
- g) Raport mjeko-ligjor që provon aftësitë fizike dhe mendore, të lëshuar nga komisioni mjekësor.
- h) Fotografi, 2 copë, me përmasa 4×6 cm
Komisioni që shqyrton kërkesat në këtë rast ngrihet pranë Drejtorive Vendore të Policisë së paku një herë në muaj dhe brenda 30 ditësh nga data e aplikimit merr një vendim.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.