Ligj i ri për rezervat e shtetit – Ministria e Brendshme: Realiteti ka sjellë nevojën për përditësim të thellë të legjislacionit
Tërmeti, pandemia por edhe mangësi të theksuara teknike kanë sjellë domosdoshmërinë për ndryshimin e Ligjit për Rezervat e Shtetit, cili është në fuqi që prej vitit 2008. Ministria e Brendshme ka hedhur për konsultim publik një seri ndryshimesh të këtij ligji, i cili ndryshon në masën 70%. Në relacionin shoqërues Ministria thekson se Ligji aktual përbën mangësi të theksuara gjuhësore, konceptuale dhe të teknikës legjislative të cilat përbëjnë shkak për keqinterpretime të normave në lidhje me administrimin e rezervave materiale të shtetit;
Problem tjetër është Pamundësi e zbatimit në praktikë të shumë detyrimeve me natyrë teknike që paraqet akti të cilat rezultojnë në rastin më të mirë jo efiçente; po edhe mosrregullim i qartë i marrëdhënieve institucionale që krijohen midis institucioneve përgjegjëse për krijimin dhe administrimin e rezervave materiale të shtetit dhe institucioneve të tjera, kryesisht qendrore, vendore dhe operacionale të mbrojtjes civile. Ndërkohë që realiteti actual ka sjellë nevojën për përditësim të legjislacionit për të qenë aktual dhe mbi të gjitha, koherent me ndryshimet e fundit ligjore të miratuara në fushën e mbrojtjes civile.
Projektakti i propozuar pritet të adresojë drejtpërdrejt problematikat e lartpërmendura dhe të rrisë efiçencën e punës së institucioneve të administrimit të rezervave materiale të shtetit në këtë drejtim. Në përmbajtje të tij janë përfshirë koncepte të reja shumë dobiprurëse për mbarëvajtjen e punës, si bashkëpunimi ndërkombëtar, burime të reja të financimit, të cilat janë më koherente me zhvillimet aktuale të vendit, rikonceptim i bashkëpunimit me subjektet private, duke i trajtuar si partnere kryesore dhe duke parashikuar shkëmbimin e informacioneve dhe eksperiencave me ta etj. “Të tilla parashikime ligjore, përveç rritjes së efiçencës së institucioneve të rezervave materiale të shtetit, pritet të ndikojnë pozitivisht edhe nga pikëpamja financiare”, thekson në relacion Ministria e Brendëshme.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.